اہلسنت والجماعت کے رہنما مفتی منیر معاویہ کی نماز جنازہ پارلیمنٹ ہاؤس کے سامنے ادا

نماز جنازہ میں اہلسنت والجماعت کے رہنماؤں اور کارکنوں نے بڑی تعداد میں شرکت کی

ویب ڈیسک January 04, 2014

مفتی منیر احمد معاویہ گزشتہ روز اسلام آٓباد کے سیکٹر آئی ایٹ میں فائرنگ کے نتیجے میں ساتھی سمیت جاں بحق ہوگئے تھے۔ فوٹو: این این آئی

گزشتہ روز فائرنگ کے نتیجے میں جاں بحق ہونے والے اہلسنت والجماعت کے رہنما مفتی منیر احمد معاویہ اور ان کے ساتھی کی نماز جنازہ پارلیمنٹ ہاؤس کے سامنے ادا کردی گئی۔

ایکسپریس نیوز کے مطابق اہلسنت والجماعت اسلام آباد کے جنرل سیکٹری مفتی منیر احمد معاویہ اور ان کے ساتھی اسد محمود کی نماز جنازہ پارلیمنٹ کے سامنے ڈی چوک میں ادا کی گئی۔ نماز جنازہ میں اہلسنت والجماعت کے ڈپٹی سیکٹری جنرل پنجاب مولانا مسعود الرحمن عثمانی سمیت دیگر رہنماؤں اور کارکنوں نے بڑی تعداد میں شرکت کی، اس موقع پر سیکیورٹی کے سخت انتظامات کئے گئے تھے۔ مفتی منیر احمد معاویہ کی تدفین ان کے آبائی علاقے نگری ڈھڈیال گلیات میں کی جائے گی۔

واضح رہے کہ گزشتہ روز جمعہ کی نماز کے بعد مفتی منیر احمد معاویہ اپنے ساتھی اسد محمود کے ہمراہ گاڑی میں جارہے تھے کہ اسلام آباد کے سیکٹر آئی ایٹ تھری میں نامعلوم موٹر سائیکل سواروں نے اندھا فائرنگ کردی جس کے نتیجے میں دونوں موقع پر ہی جاں بحق ہوگئے۔