بگ تھری بھارت، انگلینڈ،آسٹریلیا کے ساتھ ویسٹ انڈیز بھی5رکنی باڈی میں شامل ہے۔ فوٹو: فائل
بگ تھری بھارت، انگلینڈ،آسٹریلیا کے ساتھ ویسٹ انڈیز بھی5رکنی باڈی میں شامل ہے، کونسل کے کوڈ آف کنڈکٹ میں ترمیم پر بھی اتفاق ہوگیا، منظوری کے بعد محمد عامر کو ڈومیسٹک کرکٹ میں شرکت کا موقع مل سکے گا۔ تفصیلات کے مطابق تشکیل نو کے نتیجے میں بننے والی آئی سی سی ایگزیکٹیو کمیٹی میں بھارت، انگلینڈ اور آسٹریلیا کے بعد پاکستان چوتھا رکن ہوگا،اس کی نمائندگی نجم سیٹھی کریںگے، ویسٹ انڈیز کو بھی رکنیت حاصل ہوگی۔
یاد رہے کہ نئے سسٹم کے تحت تمام کمیٹیز اسی کو جواب دہ ہونگی۔ایگزیکٹیو کمیٹی آئی سی سی کے آئینی، انسداد بدعنوانی، ضابطہ اخلاق، سالمیت، ترقیاتی اور ہیومن ریسورس امورنمٹانے کی مجاز گی، وہ آئی سی سی بورڈ کو آپریشنل اور انتظامی معاملات میں ہدایات بھی دے گی۔ دوسری طرف آئی سی سی اینٹی کرپشن کوڈ میں ترمیم کے بعد ایک نئی شق کو شامل کرلیا گیا جس کے تحت پابندی کا سامنا کرنے والے کھلاڑیوں کو سزا کی مدت ختم ہونے سے پہلے ڈومیسٹک کرکٹ کھیلنے کی اجازت ہوگی۔
یاد رہے کہ نجم سیٹھی نے گذشتہ برس اسپاٹ فکسنگ میں سزا یافتہ محمد عامر پر پابندی میں نرمی کی درخواست کی تھی، اس پر آئی سی سی نے ایک کمیٹی تشکیل دی جس نے کوڈ آف کنڈکٹ میں نئی شق کا اضافہ کیا ہے، اس کی آئی سی سی بورڈ سے منظوری جلد متوقع ہے جس کے بعد محمد عامر کی ڈومیسٹک کرکٹ میں واپسی کیلیے پی سی بی درخواست کرسکے گا۔
دریں اثنا نجم سیٹھی نے کہا ہے کہ آئی سی سی ایگزیکٹیو کمیٹی میں نمائندگی سے پاکستان کھیل سے متعلق ہونے والے تمام اہم اور کلیدی فیصلوں میں شریک ہو سکے گا، پی سی بی اب کرکٹ کی عالمی برادری میں اگلی صفوں میں کھڑا ہوگا، اس کا یہ مقام اہم اور غیر متنازع رہے گا۔ محمدعامرکیس کے حوالے سے چیئرمین پی سی بی نے کہاکہ آئی سی سی اینٹی کرپشن کوڈ میں ترمیم عامر کی کرکٹ میں قبل از وقت واپسی کی طرف ایک اوراہم قدم ہے،وہ وقت دور نہیں جب پیسر ایکشن میں نظر آئیں گے۔
تبصرے
ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔