’’بگ ٹو‘‘ کے آنکھیں دکھانے پر آئی سی سی سرنگوں

ٹرینٹ برج ٹیسٹ میں کھیل کی اسپرٹ سے کھیلنے والے جڈیجا اور اینڈرسن دودھ کے دھلے ثابت، سزاؤں سے بچ نکلے

Sports Desk August 02, 2014

ٹرینٹ برج ٹیسٹ میں کھیل کی اسپرٹ سے کھیلنے والے جڈیجا اور اینڈرسن دودھ کے دھلے ثابت، سزاؤں سے بچ نکلے۔ فوٹو: فائل

''بگ ٹو'' کے آنکھیں دکھانے پر آئی سی سی سرنگوں ہو گئی، ٹرینٹ برج ٹیسٹ میں کھیل کی اسپرٹ سے کھیلنے والے رویندرا جڈیجا اور جیمز اینڈرسن دودھ کے دھلے ثابت کردیے گئے۔

تفصیلات کے مطابق انگلینڈ اور بھارت کے مابین جاری سیریز میں ٹرینٹ برج ٹیسٹ کے دوسرے روز لنچ بریک میں جیمز اینڈرسن اور رویندرا جڈیجا الجھ پڑے تھے، مہمان ٹیم نے شکایت درج کرائی کہ انگلش پیسر نے آل راؤنڈر کوگالیاں اور دھکے دیے، جواب میں میزبان بورڈ نے بھی جڈیجا پر اینڈرسن کی جانب دھمکانے کے انداز میں لپکنے کا الزام لگایا۔

اس معاملے پرلیول ٹو خلاف ورزی کی شکایت درج کرائی گئی،آئی سی سی میچ ریفری ڈیوڈ بون نے معاملے کو لیول ''ٹو'' کے بجائے ''ون'' کا درجہ دیا جس کے تحت زیادہ سے زیادہ 50فیصد میچ فیس کی سزا ہی ہوسکتی تھی، اس طرح جڈیجا پابندی سے بچ نکلے، لیول ٹو کے اطلاق پر وہ ایک میچ کیلیے معطل ہو سکتے تھے۔ بگ تھری کی سربراہی کے نشے میں چور بھارتی بورڈ آئی سی سی کے اس خصوصی رعایتی پیکج سے بھی خوش نہ ہوا، اس نے اصرار کیاکہ جڈیجا کی کوئی غلطی نہیں تھی، اسے مکمل سپورٹ کرینگے۔

بعد ازاں آل رائونڈر کی سزا کو انا کا مسئلہ بناتے ہوئے اس کیخلاف اپیل بھی کردی گئی جسے آئی سی سی نے سماعت کیلیے قبول کرلیا، جمعے کو جوڈیشل کمشنر گورڈن لیوس نے کیس کی سماعت کرکے بھارت کی مرضی کا فیصلہ کرتے ہوئے ایک طرف جڈیجا کو کلین چٹ دیدی، دوسری طرف اینڈرسن کو بھی بے گناہ قراردیدیا۔آئی سی سی کی پریس ریلیز کے مطابق ویڈیو کانفرنس کے ذریعے 6گھنٹے کی سماعت میں بھارتی اور انگلش کرکٹرز سمیت گواہوں کے بیانات پر جرح مکمل کرنے کے بعد بے قصور ثابت ہوئے،اس دوران ای سی بی کے نمائندہ پال ڈونٹن، بی سی سی آئی کے سندر رامن اور ایم وی سدھیر، آئی سی سی کے جنرل منیجر کرکٹ جیف ایلرڈائس اور وکیل سیلی کلارک بھی موجود تھے۔