گوادر پورٹ آپریشنل معاملات چین کے پاس ہیں کامران مائیکل

پورٹ پر 2 لاکھ 50 ہزار ٹن وزنی جہاز لنگر انداز ہوسکتے ہیں، وفاقی وزیر جہاز رانی و بندرگاہ۔ فوٹو: اے پی پی/فائل

---

وفاقی وزیر جہاز رانی و بندر گاہ کامران مائیکل نے کہاہے کہ گوادر پورٹ پر اڑھائی لاکھ ٹن وزنی جہاز لنگر انداز ہو سکے گا اور اس کی گہرائی نہ صرف پاکستان میں موجود بندرگاہوں سے زیادہ ہے بلکہ بندر گاہ خلیج فارس، بحیرہ عرب، بحر ہند، خلیج بنگال سے بھی زیادہ گہری ہے۔

وفاقی وزیر کامران مائیکل کا کہنا تھا کہ وہ اس وقت گوادر پورٹ کو آپریشنل کر چکے ہیں اور اس کی تین برتھیں آپریشنل ہیں جن میں سے ہر ایک کی لمبائی کم از کم دو سو میٹر ہے۔ وفاقی وزیر نے کہا کہ وفاقی حکومت گوادر میں انٹرنیشنل اسٹینڈرڈ کا ایئر پورٹ تعمیر کر رہی ہے اس منصوبے پر چھبیس ارب روپے لاگت آئے گی اور جلد ہی اس منصوبے کا افتتاح کیا جائیگا۔

گوادر پورٹ کے آپریشنل معاملات کا ذکر کرتے ہوئے وفاقی وزیر نے بتایا کہ دوست ملک چائنہ سے دوہزارتیرہ کے معاہدے کی روشنی میں بندر گاہ کے آپریشنل معاملات چائنہ کے حوالے کر دیے گئے اور گوادر پورٹ اتھارٹی کیساتھ مشاورت کر کے چائنہ ہی اس کے آپریشنل معاملات دیکھ رہا ہے۔ انھوں نے گوادر پورٹ پر ترقیاتی کاموں کے بارے میں مزید کہا کہ ہماری حکومت گوادر میں ''ایسٹ بے ایکس پریس وے'' تعمیر کر رہی ہے اور یہ سڑک پوری گوادر پورٹ پر شریان کی سی اہمیت رکھتی ہے کیونکہ پورٹ کی ساری ٹریفک اور انتقال رسانی کا کام اسی شاہراہ کے ذریعے سے ہو گا۔ وفاقی وزیر نے کہا منصوبے کی جلد تکمیل کیلیے دن رات کام جاری ہے اور چودہ ارب روپے اس منصوبے کی تکمیل پر لاگت آئیگی۔