سری لنکا سے ون ڈے سیریز جیتنے کا کریڈٹ پوری ٹیم کو جاتا ہے اظہرعلی

امید ہے پاکستان سری لنکا کو محدود اوورز کی سیریز میں 0-2 سے شکست دے گا، اظہرعلی فوٹو: ایکسپریس نیوز

---

قومی ون ڈے کرکٹ ٹیم کے کپتان اظہرعلی کا کہنا ہے کہ سری لنکن ٹیم اپنے ہوم گراؤنڈ پر مضبوط ٹیم ہے لیکن امید ہے ون ڈے سیریز کی طرح ٹی ٹوئنٹی میں بھی قومی ٹیم فتح یاب ہوگی۔

سری لنکا سے واپسی پرعلامہ اقبال انٹرنیشنل ایئرپورٹ پرمیڈیا سے بات کرتے ہوئے اظہرعلی کا کہنا تھا کہ سری لنکا اپنے ہوم گراؤنڈ میں اچھا کھیل پیش کرتا ہے لیکن قومی ٹی ٹوئنٹی ٹیم میں بہت ٹیلنٹ ہے اس لئے امید ہے پاکستان سری لنکا کو محدود اوورز کی سیریز میں 0-2 سے شکست دے گا۔ انہوں نے کہا کہ سری لنکا سے ون ڈے سیریز جیتنے کا کریڈٹ پوری ٹیم کو جاتا ہے تاہم آخری ون ڈے میں ہماری کارکردگی اچھی نہیں تھی اور پانچویں میچ میں پرانے میچز جیسی کارکردگی نہ دکھا سکے۔

اظہرعلی کا کہنا تھا کہ آئرلینڈر کے خلاف بولرز نے جس طرح پرفارم کیا وہ قابل تحسین ہے، یاسر شاہ، انورعلی اورعماد وسیم نے حیران کن پرفارمنس پیش کی، اس سیریز میں کھلاڑیوں نے جس طرح کی فیلڈنگ کی قومی ٹیم میں اس طرح کی فیلڈنگ کم ہی دیکھنے کو ملتی ہے۔ ان کا کہنا تھا کہ ایسی سیریز بہت کم ہوتی ہیں جس میں تمام کھلاڑیوں کی پرفارمنس اچھی ہو، ون ڈے میں جب واپس آیا تو مجھ پربہت پریشرتھا لیکن ٹیم کو متحد رکھنے کے لئے کوشش کرتا ہوں کہ ہرکھلاڑی کی حوصلہ افزائی کروں۔