سری دیوی اور نواز الدین صدیقی  پہلی بار فلم میں ایک ساتھ جلوہ گر ہوں گے

پروڈیوسر بونی کپور کی فلم ’’موم‘‘ میں دونوں پہلی بار ایک ساتھ نظر آئیں گے،فوٹو:فائل

---

KARACHI: بالی ووڈ میں اپنے کردار میں ڈھل جانے کے حوالے سے مشہور اداکار نوازالدین صدیقی انڈسٹری کی صف اول کی اداکارہ سری دیوی کے ساتھ پہلی بار فلم ''موم'' میں مرکزی کردار ادا کریں گے۔

بالی ووڈ اداکارہ سری دیوی کا شمار فلم نگری کی ممتاز اداکاراؤں میں ہوتا ہے جنہوں نے کئی دہائیاں فلم نگری پر راج کیا وہ فلم نگری کے تمام صف اول کے اداکاروں کے ساتھ کرچکی ہیں یہی وجہ ہے کہ ان کے ساتھ فلموں میں کام کرنا کسی بھی اداکار کے لیے اعزاز سے کم نہیں تاہم اب فلم نگری کے ایک اور نامور اداکار نواز الدین صدیقی سری دیوی کے مدمقابل ایکشن میں نظر آئیں گے۔

میڈیا رپورٹس کے مطابق اداکار نواز الدین صدیقی لیجنڈری اداکارہ سری دیوی کے ساتھ پہلی بار فلم ''موم'' میں جلوہ گر ہوں گے جسے اداکارہ کے شوہر نامور ہدایتکار بونی کپور پروڈیوس کریں گے جب کہ فلم کی کہانی خواتین کے گرد گھومتی ہے جس میں دونوں کے کردار کو مخفی رکھا جارہا ہے تاہم فلم کی حتمی کاسٹ اور شوٹنگ شیڈول کا اعلان جلدہی کیا جا ئے گا۔

واضح رہے کہ اداکار نواز الدین صدیقی اپنی نئی آنے والی فلم ''ٹی ای تھری این'' کی شوٹنگ میں مصروف ہیں جس میں میگا اسٹار امیتابھ بچن اور اداکارہ ودیا بالن مرکزی کردار ادا کررہی ہیں۔