اب کانٹیکٹ لینس سے ویڈیو ریکارڈ اور اسٹور کرنا ممکن

سونی نے ایسے آئی کانٹیکٹ لینس پر کام شروع کیا ہے جو زوم کرنے کے علاوہ ویڈیو اسٹورکرنے کی بھی صلاحیت رکھتا ہے۔

ویب ڈیسک May 01, 2016

سونی نے ایسے آئی کانٹیکٹ لینس پر کام شروع کیا ہے جو زوم کرنے کے علاوہ ویڈیو اسٹورکرنے کی بھی صلاحیت رکھتا ہے۔ فوٹو: فائل

سونی کمپنی نے ایک ایسے کانٹیکٹ لینس پر کام شروع کردیا ہے جو ویڈیو ریکارڈ اور اسٹور کرسکتا ہے اس کے علاوہ اس میں زوم ان اور زوم آؤٹ کی سہولت بھی موجود ہوگی اور یہ ویڈیو بھی چلاسکے گا۔

سونی اس انوکھے اور انقلابی طریقے پرکام کررہی ہے جس کے ذریعے آنکھ میں لینس لگا کر کوئی بھی ویڈیو بنائی جاسکی ہے جس میں ویڈیو بنانے کے علاوہ حیران کن طور پر زوم ان اور زوم آؤٹ بھی کیا جاسکے گا۔اس لینس کی ڈیزایننگ اور تیاری میں سونی کے علاوہ جاپان کی دوسری 7 بڑی ٹیکنالوجی کمپنیوں نے کام کیا جن میں سے کسی نے کیمرہ بنایا تو کسی نے وائرلیس پروسیسنگ اور کسی نے تو اسٹوریج سسٹم بھی تیارکرلیا ہے۔

اس سے ظاہر ہوتا ہے کہ بہت جلد انسانی آنکھ میں لگائے جانے والے لینس ہی جاسوس کیمروں کی طرح تصاویر اور ویڈیو ریکارڈ اور جمع کرسکیں گے۔ اسے پلک جھپکا کرآنکھ بندکرکے آن کیا جاسکے گا۔ اسی طرح ویڈیو چلانے کے لئے آنکھوں کی کوئی خاص حرکت سے اسے ممکن بنایا جاسکے گا۔

مثلاً آنکھ کی اطراف کو دو مرتبہ دباکر اس تصویر اور ویڈیو کے آپشن کو آن یا آف کیا جاسکتا ہے۔ اس کے علاوہ لینس میں زومنگ اور فوکس کی سہولت بھی موجود ہیں تاہم اس پیٹنٹ پرغور کا کام اب بھی جاری ہے۔

واضح رہے کہ اس سے قبل 2014 میں گوگل نے بھی ایسے کانٹیکٹ لینس کا اعلان کیا تھا جس میں لگے سینسر خون میں شوگر کی مقدار کو ناپ کر اس سے مریض کو خبردار کرسکتے تھے۔