دبنگ خان کی فلم ’’سلطان‘‘ باکس آفس پر’’پریم رتن دھن پایو‘‘ کا ریکارڈ توڑنے میں ناکام

دبنگ خان کی عید الفطر پر ریلیز ہونے والی فلم ’سلطان‘ نے ایک بار پھر شائقین کے دل جیت لیے،فوٹو:فائل

---

KARACHI: دبنگ خان کی عید الفطر پر ریلیز ہونے والی فلم 'سلطان' ایک بار پھر شائقین کو متاثر کرنے میں کامیاب ہوگئی تاہم فلم سلومیاں کی اپنی ہی فلم 'پریم رتن دھن پایو' کا ریکارڈ توڑنے میں ناکام رہی۔

سلمان خان کا شمار فلم نگری میں صف اول کے اداکاروں میں ہوتا ہے جنہوں نے اب تک متعدد بلاک بسٹر فلموں میں اداکاری کے جوہر دکھائے ہیں اور اس بار دبنگ خان کی عید الفطر پر ریلیز ہونے والی فلم 'سلطان' نے ایک بار پھر شائقین کے دل جیت لیے اور ریلیز کے صرف پہلے ہی دن فلم 37 سے 38 کروڑ روپے کا بزنس کرنے میں کامیاب ہوگئی۔

اس خبر کو بھی پڑھیں : فلم ''پریم رتن دھن پایو'' کا 3 دن میں 100 کروڑ سے زائد کا بزنس

باکس آفس انڈیا کے مطابق فلم 'سلطان' ریلیز کے پہلے دن اس سال ریلیز ہونے والی تمام فلموں میں سب سے زیادہ کمائی کرنے والی فلم رہی لیکن سلو میاں کی اپنی ہی فلم 'پریم رتن دھن پایو' کا ریکارڈ توڑنے میں ناکام رہی ہے کیونکہ فلم 'پریم رتن دھن پایو' نے ریلیز کے پہلے ہی دن 40 کروڑ کا بزنس کیا تھا۔ فلمی پنڈتوں کے مطابق فلم کا ریکارڈ بزنس نہ کرنے کی وجہ چھٹی کے دن ریلیز نہ ہونا ہے تاہم امید کی جارہی ہے کہ فلم 'سلطان' عید کی چھٹیوں اور اس کے بعد ہفتہ وار تعطیلات پر ریکارڈ بزنس کرنے میں کامیاب ہوجائے گی۔

اس خبر کو بھی پڑھیں : فلم ''بجرنگی بھائی جان'' کا 3 دن میں 100کروڑ سے زائد کا بزنس

واضح رہے کہ گزشتہ سال عید کے موقع پر ریلیز ہونے والی سلمان خان کی فلم 'بجرنگی بھائی جان ' نے صرف بھارت میں 318 کروڑ روپے سے زائد کا بزنس کیا تھا جب کہ رواں سال ریلیز ہونے والی فلم 'پریم رتن دھن پایو' نے دنیا بھر میں 400 کروڑ سے زائد کا بزنس کیا۔