گزشتہ ماہ 13 دہشت گردوں کے 2 گروپوں نے اسلام آباد میں حملوں کا منصوبہ بنایا تھا، طارق مسعود یٰسین. فوٹو؛ فائل
ایکسپریس نیوز کے مطابق آئی جی اسلام آباد طارق مسعود یٰسین نےسینیٹ کی قائمہ کمیٹی برائے داخلہ کو بریفنگ کے دوران انکشاف کیا کہ 13 دہشت گردوں کے 2 گروپوں نے اسلام آباد میں حملوں کا منصوبہ بنایا تھا جسے حساس اداروں کی جانب سے حملوں سے متعلق ملنے والی معلومات کے بعد ناکام بنادیا گیا۔ انہوں نے بتایا کہ ان حملوں سے متعلق اسلام آباد سیف سٹی منصوبے کے تحت گرفتار کئے گئے ملزموں نے دوران تفتیش انکشاف کیا۔
آئی جی اسلام آباد کے مطابق وفاقی دارالحکومت میں حملہ آروں نے دہشت گردی کے لئے گزشتہ ماہ دو منصوبے بنائے تھے، پلان اے میں قائداعظم یونیورسٹی پر حملہ کرنا اور سرینا ہوٹل میں شہریوں کو یرغمال بنانا تھا جب کہ پلان "بی" میں علامہ اقبال اوپن یونیورسٹی میں خودکش حملہ اور میریٹ ہوٹل میں ملکی و غیر ملکی لوگوں کو یرغمال بنانا تھا۔ ان کا کہنا تھا کہ قومی سلامتی کے اداروں اور پولیس نے مل کر سیف سٹی پر وجیکٹ کے تحت گاڑیوں کو چیک کرکے دہشت گردی کا منصوبہ ناکام بنایا جس کے دوران متعدد ملزمان گرفتار کئے گئے جن سے مزید تفتیش کا سلسلہ جاری ہے۔
تبصرے
ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔