شاہد آفریدی نے جاوید میانداد کیخلاف بیان بازی پر معذرت کرلی

جاوید میانداد ایک عرصے سے تنقید کا نشانہ بنا رہے ہیں تاہم اپنے بیان پر معذرت خواہ ہوں، آفریدی۔ فوٹو:فائل

---

قومی کرکٹ ٹیم کے سابق کپتان اور بوم بوم کے نام سے مشہور شاہد آفریدی نے لیجنڈری کرکٹر جاوید میانداد کے خلاف بیان بازی پر معافی مانگ لی۔

کراچی میں روزنامہ ایکسپریس کے اسپورٹس ایڈیٹر سلیم خالق کی کتاب "کرکٹ کارنر" کی تقریب رونمائی کے دوران میڈیا سے بات کرتے ہوئے شاہد آفریدی نے لیجنڈری کرکٹر جاوید میانداد کو تنقید کا نشانہ بنایا اور کہا کہ جاوید میانداد کو ہمیشہ پیسوں کا مسئلہ درپیش رہا ہے ملک کے اتنے بڑے کرکٹر کو پیسوں کی بات نہیں کرنی چاہئے اور یہی فرق عمران خان اور جاوید میانداد کے درمیان ہے۔

I regret what I said to a senior but of course I had to eventually react to his behaviour.

— Shahid Afridi (@SAfridiOfficial) October 9, 2016

دوسری جانب جاوید میانداد کے خلاف بیان بازی پر بوم بوم آفریدی کو سوشل میڈیا پر تنقید کا سامنا کرنا پڑا جس پر انہوں نے ٹوئٹر پیغام میں اپنے بیان پر معذرت کی اور کہا کہ جاوید میانداد لیجنڈ کرکٹر ہیں لیکن وہ بغیر کسی وجہ کے میڈیا پر میری ذات پر ایک عرصے سے حملے کررہے ہیں، اس کے باوجود میں نے ایک عرصے تک درگزر کیا، برداشت کی بھی ایک حد ہوتی ہے جو کچھ کہا وہ فطری تھا تاہم میں اپنے بیان پر معذرت خواہ ہوں۔ ان کا کہنا تھا کہ کرکٹ کی بدولت عوام سے پیار اور محبت کا رشتہ اب تک قائم ہے، 20 سالہ کیریئر میں اللہ نے جو نام دیا ہے وہ پہلے بھی تھا آج بھی ہے اور آئندہ بھی رہے گا حالات جیسے بھی ہوں مجھے کوئی فرق نہیں پڑتا۔

Javed Miandad is legend of cricket but he used very harsh words on TV for long time. He made personal attack on me for no reason1/2

— Shahid Afridi (@SAfridiOfficial) October 9, 2016

شاہد آفریدی نے کہا کہ پشاور زلمی نے ملک میں نیا ٹیلنٹ متعارف کرانے کے لئے اہم کردار ادا کیا پہلے میں نے اس کی کپتانی کی اب پشاور زلمی کا صدر بننے کے بعد ذمہ داری مزید بڑھ گئی ہے۔ ان کا کہنا تھا کہ فرسٹ کلاس کرکٹ میچز کے ساتھ پاکستان سپر لیگ میں بھی حصہ لوں گا اور آئندہ کا لائحہ عمل پی سی بی کے ایگزیکٹوڈائریکٹر نجم سیٹھی سے ملاقات کے بعد طے کروں گا۔