عوام وزیراعظم سے جلد از جلد چھٹکارا حاصل کرنا چاہتے ہیں شیخ رشید

ہم جہاں بھی بھاگیں گے پاکستان میں ہی جائیں گے، گرفتاری ہوئی تو جیل ہمارا سسرال ہے، شیخ رشید. فوٹو: فائل

---

LONDON: عوامی مسلم لیگ کے سربراہ شیخ رشید کا کہنا ہے کہ 2 نومبر کو پورا راولپنڈی اور اسلام آباد بند کر کے ثابت کریں گے کہ عوام وزیراعظم نواز شریف سے جلد از جلد چھٹکارا حاصل کرنا چاہتے ہیں۔

سپریم کورٹ کے باہر میڈیا سے بات کرتے ہوئے شیخ رشید کا کہنا تھا کہ وزیراعظم نوازشریف نے اپنے اثاثے غلط ظاہر کئے جس پر وہ آرٹیکل 62 اور 63 کے تحت نا اہل ہوتے ہیں، انہوں نے سپریم کورٹ میں موقف اختیار کیا کہ یا تو ان 9 افراد کی قومی اسمبلی کی رکنیت بحال کی جائے یا پھر وزیراعظم کو بھی نا اہل قرار دیا جائے، جس پر عدالت نے کہا کہ ہم نے وزیراعظم کو نوٹس جاری کردیا ہے، جس پر میں نے موقف اختیار کیا کہ وزیراعظم رنگے ہاتھوں پکڑے گئے ہیں، ان کا جرم انتا بڑا ہے کہ وہ شوکاز نوٹس کے مستحق ہیں۔

شیخ رشید کا کہنا تھا کہ ہم نے 28 تاریخ کو راولپنڈی میں وارم اپ ریلی رکھی ہے جس میں عمران خان بھی شریک ہوں گے، اگر ہماری گرفتاری ہوتی ہے تو جیل تو ہماری سسرال ہے، جیلیں تو نواز شریف کو معافی نامے پر مجبور کرتی ہیں، ہماری گردن کٹ سکتی ہے لیکن ہم 2 نومبر کو راولپنڈی کی سڑکیں، ایئرپورٹس، ریلوے اسٹیشن اور ٹرانسپورٹ کو بند کر کے دکھائیں گے اور ثٓابت کریں گے کہ موجودہ حکومت کرپٹ ہے۔ انہوں نے کہا کہ ہم جہاں بھی بھاگیں گے پاکستان میں ہی جائیں گے لیکن نواز شریف کے لئے اب سعودی عرب میں بھی جگہ نہیں ہے، ترکی انہیں جگہ دے دے تو کچھ کہہ نہیں سکتا، لوگوں کی خواہش ہے کہ جلد سے جلد وزیراعظم نواز شریف سے جان چھڑائی جائے۔