ترکی میں تقریب کے دوران روسی سفیر قاتلانہ حملے میں ہلاک

روسی سفیرانقرہ میں ہونے والی تقریب میں شریک تھے جہاں ان کے پیچھے کھڑے حملہ آور نے سفیر پر سرعام فائرنگ کردی۔

ویب ڈیسک December 19, 2016

روسی سفیرانقرہ میں ہونے والی تقریب میں شریک تھے جہاں ان کے پیچھے کھڑے حملہ آور نے سفیر پر سرعام فائرنگ کردی۔ فوٹو؛ اے پی

PESHAWAR: ترکی کے دارالحکومت انقرہ میں مسلح شخص نے روسی سفیر پر فائرنگ کردی جس سے موقع پر ہی ہلاک ہوگئے جب کہ حملہ آور ترکی پولیس کا اہلکار بتایا جاتا ہے۔

ترکی کے دارالحکومت انقرہ میں روسی سفیر آندرے کارلوف ایک آرٹ گیلری میں منعقد تقریب سے خطاب کررہے تھے کہ اس دوران ان پر مسلح شخص نے فائرنگ کردی جس کے نتیجے میں وہ موقع پر ہی ہلاک ہوگئے جب کہ فائرنگ سے مزید 3 افراد بھی زخمی ہوئے۔

روسی حکومت نے واقعے کی تصدیق کرتے ہوئے کہا ہے ترکی میں ان کے سفیر 62 سالہ آندرے کارلوف شہر کے ایک علاقے سانکیا میں ایک آرٹ نمائش میں شریک تھے جہاں میڈیا سمیت دیگر افراد کی موجودگی میں ایک مسلح شخص نے تقریر کے دوران سفیر پر فائرنگ کردی جس سے وہ موقع پر ہی ہلاک ہوگئے۔ روسی حکومتی ترجمان نے واقعے کی شدید مذمت کرتے ہوئے اپنے سفیر کو دہشت گردی کے خلاف جنگ کا ایک اہم فرد قرار دیا ہے۔

خبر ایجنسی کے مطابق حملہ آور خود کو پولیس اہلکار بتا کر تقریب میں شامل ہوا جو سوٹ اور ٹائی میں ملبوس تھا، حملہ آور نے روسی سفیر پر 8 فائر کیے، حملہ آور عین سفیر کے پیچھے کھڑا تھا اور اس نے ساری گولیاں سفیر کی پشت پر ہی چلائیں جب کہ اس نے بعض الفاظ روسی زبان میں بھی ادا کیے اور نمائش میں رکھی تصاویر کو توڑ دیا، واقعے کے فوراً بعد سیکیورٹی اہلکاروں نے حملہ آور پر بھی فائرنگ کرکے اسے موقع پر ہلاک کردیا۔

برطانوی اخبار کا کہنا ہےکہ حملہ آورنے ''شام کو نہ بھولو، حلب کو نہ بھولو'' کا بھی نعرے لگایا۔ ترک اخبار حریت کے مطابق حملہ آور نے شام کے شہر حلب کا نام لیا اور انتقام جیسے الفاظ بھی ادا کیے تاہم اب تک کسی بھی گروہ نے حملے کی ذمے داری قبول نہیں کی ہے۔

عالمی میڈیا کا کہنا ہےکہ روسی سفیر کو قتل کرنے والا حملہ آور ترکی کا پولیس افسر ہے جو اس وقت ڈیوٹی پر موجود نہیں تھا۔ امریکی اسٹیٹ ڈپارٹمنٹ کے ترجمان جان کربی نے واقعے کی مذمت کرتے ہوئے ہلاک ہونے والے سفیر کے اہلِ خانہ سے دلی تعزیت کی ہے جب کہ اقوام متحدہ کے سیکریٹری جنرل کی جانب سے بھی واقعے کی شدید الفاظ میں مذمت کی گئی ہے۔

یاد رہے کہ جولائی 2013 میں روس اور ترکی کے درمیان شدید تناؤ اس وقت پیدا ہوا تھا جب شامی سرحد کے پاس ترک جنگی طیارے نے ایک روسی طیارے کو مار گرایا تھا جس کے بعد ترکی نے روس سے باضابطہ معافی مانگی تھی۔ اس وقت شام میں روسی افواج کی کارروائیوں اور بشارالاسد کی حمایت کے خلاف ترکی میں کئی مقامات پر عوام کا احتجاج بھی جاری ہے۔