آج محبت کا عالمی دن منایا جارہا ہے چاکلیٹ اور پھولوں کی فروخت بڑھ گئی

تین ہٹی :پھول مارکیٹ میں دکاندار گلدستے بنارہا ہے۔ فوٹو : ایکسپریس

---

دنیا بھر کی طرح آج پاکستان میں بھی 14 فروری کو محبت کا عالمی دن منایا جارہا ہے۔

محبت کے عالمی دن کے موقع پر پھول،کارڈز،اور دیگر گفٹ آئٹمز کی مانگ میں اضافہ ہوگیا ہے کراچی کے شہری ڈیفنس ،کلفٹن،طارق روڈ اور نارتھ ناظم آباد کے بازاروں میں شاپنگ میں مصروف ہیں محبت کے اس عالمی دن کو عام عوام کی طرح سیاست دان ،کھلاڑی اور فنکار بھی منایا جارہا ہے ،شہری اپنے چاہنے والوں کو پھول خصوصاً کٹ سرخ گلاب ، چاکلیٹس اور دیگر تحائف دے کر محبت کا اظہار کریں گے،سندھ فلاورز ایسوسی ایشن کے صدر نجم الحسن نے بتایا کہ ویلن ٹائن ڈے کی مناسبت سے چند روز کے دوران پھولوں اور خصوصاً کٹ پھول کی فروخت بڑھ گئی ہے۔



سرخ گلاب کی فروخت میں بھی اضافہ ہوا ہے،کٹ پھول کی قیمت 100 روپے جبکہ امپورٹڈ کٹ پھول کی قیمت 150روپے سے بھی زائد رہی، فلاورز ایسوسی ایشن کے سیکریٹری اقبال شیخ نے بتایا کہ اس دن کی مناسبت سے گلدستوں کی فروخت بھی بڑھ جاتی ہے جس کی وجہ سے گلدستوں کی قیمتوں میں بھی 100 روپے سے 300 روپے تک اضافہ ہوگیا ہے۔

علاوہ ازیں شہر کی مختلف مارکیٹوں ، سپر اسٹورز اور دکانوں پر چاکلیٹس کی فروخت میں اضافہ دیکھنے میں آیا ہے، دکانداروں کا کہنا تھا کہ ویلن ٹائن ڈے پر طلب بڑھنے پر وہ چاکلیٹس ذخیرہ کرلیتے ہیں،ویلن ٹائن کے حوالے سے مختلف ہوٹلوں میں ہائی ٹی ، لنچ ، ڈنر اور بوفے پر خصوصی ڈسکائونٹ دیے گئے ہیں جبکہ استقبالیہ کو بھی سرخ رنگ کے غباروں اور دیگر آرائشی اشیا سے سجایا گیا ہے،لڑکیوں نے اس دن کو منانے کے لیے نئے کپڑے چوڑیاں اور جیولری کی خریداری بھی کی ہے،اس دن کو منانے کے لیے فنکاروں کی ایک بڑی تعداد کراچی میں موجود ہے جو آج شہر کے مختلف مقامات میں منعقدہ شوز میں پرفارم کریں گے ،اداکارہ ناہید شبیر کا کہنا ہے کہ ہمیں محبت کے اس عالمی دن کے موقع پر اس بات کا عہد کرنا چاہیے کہ ہم آپس میں محبت سے رہیں گے۔