لبنان، اسرائیل کشیدگی مکمل جنگ کی طرف جا رہی ہے، امریکا

ویب ڈیسک  پير 23 ستمبر 2024
فریقین کے درمیان جلد از جلد غزہ جنگ بندی معاہدے پر اتفاق رائے پیدا کرلیا جائے گا، جان کربی 
(فوٹو: فائل)

فریقین کے درمیان جلد از جلد غزہ جنگ بندی معاہدے پر اتفاق رائے پیدا کرلیا جائے گا، جان کربی (فوٹو: فائل)

  واشنگٹن: لبنان اور اسرائیل کے درمیان جاری کشیدگی کو امریکا نے مکمل جنگ کی طرف جانے کا خدشہ ظاہر کر دیا ہے۔

امریکی نیشنل سیکیورٹی کے ترجمان جان کربی نے اپنے ایک بیان میں کہا ہے کہ دونوں ممالک کو کشیدگی میں اضافے سے خطے میں ہونے والے نقصان سے آگاہ کر چکے ہیں۔

جان کربی نے اسرائیلی وزیر اعظم نیتن یاہو پر تنقید کرتے ہوئے کہا کہ ان کی ہٹ دھرمی ان کے حق میں بھی بہتر نہیں ہو سکتی، ترجمان نے مزید کہا کہ اسرائیلی وزیر اعظم یہودی آبادکاروں کی واپسی تک آپریشن جاری رکھنا چاہتے ہیں، لیکن یہ اقدام آبادکاروں کے لیے بھی نقصان دہ ہو گا۔

ترجمان جان کربی نے لبنان اور اسرائیل کے درمیان جاری موجودہ کشیدگی کو انتہائی غیر معمولی اور خطرناک قرار دیتے ہوئے کہا کہ مسائل کے باوجود ہم کشیدگی کا سفارتی حل نکالنے کی کوشش کریں گے۔

یاد رہے گزشتہ ہفتے پیجرز اور واکی ٹاکی میں دھماکوں کے باعث لبنان میں مزاحمتی تنظیم حزب اللہ کے اراکین سمیت 39 شہری جاں بحق اور 4 ہزار سے زائد افراد زخمی ہو گئے تھے، جبکہ جمعے کو اسرائیل کے فضائی حملے میں 45 افراد ہلاک ہو گئے تھے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔