پشاور ہائیکورٹ: توہین عدالت کی درخواست پر چیئرمین ہیلتھ کیئر کمیشن ذاتی حیثیت میں طلب

عدالت نے صوبے میں اسپتالوں، لیبارٹریز اور کلینکس میں قیمتوں کے تعین کا فیصلہ دیا تھا، عمل نہیں ہوا، درخواست گزار

ویب ڈیسک جمعرات 26 ستمبر 2024

(فوٹو: فائل)

پشاور: پشاور ہائیکورٹ کے فیصلے پر عمل درآمد نہ کرنے کے خلاف دائر توہین عدالت کی درخواست پر چیئرمین ہیلتھ کمیشن کو عدالت نے ذاتی حیثیت میں طلب کرلیا۔

جسٹس اعجاز انور اور جسٹس سید ارشد علی نے پشاور ہائیکورٹ کے فیصلے پر عملدرآمد نہ کرنے کے خلاف دائر توہین عدالت درخواست کی سماعت کی، وکیل درخواست گزار نے کہا کہ پشاور ہائیکورٹ نے 2020 میں صوبے میں اسپتالوں، لیبارٹریز اور کلینکس میں قیمتوں کے تعین کا فیصلہ دیا تھا۔

درخواست گزار کے مطابق فیصلے میں ہیلتھ کیئر کمیشن کو اسپتالوں، لیبارٹریز میں مختلف ٹیسٹ کے قیمتیں متعین کرنے کا حکم دیا تھا، مگر پشاور ہائیکورٹ کے فیصلے پر عمل درآمد نہیں ہوا جس کے بعد توہین عدالت کی درخواست دائر کی۔

عدالت نے دلائل مکمل ہونے کے بعد چیئرمین ہیلتھ کیئر کمیشن کو نوٹس جاری کرتے ہوئے ذاتی حیثیت میں پیش ہونے کا حکم جاری کردیا۔