پی آئی اے کا قرضہ ادا کرو اسٹیل ملز مفت لو مشیر خزانہ کی فراخ دلی

اسٹیل ملز بند پڑی ہے پیسہ تنخواہوں پر ضائع ہو رہا ہے، اگلا بجٹ ٹیکنوکریٹک نوعیت کا ہوگا، مفتاح اسماعیل

خبر ایجنسی/Numainda Express March 16, 2018

اسٹیل ملز بند پڑی ہے پیسہ تنخواہوں پر ضائع ہو رہا ہے، اگلا بجٹ ٹیکنوکریٹک نوعیت کا ہوگا، مفتاح اسماعیل۔ فوٹو: فائل

مشیر خزانہ مفتاح اسماعیل نے کہا ہے کہ جو پی آئی اے کا قرضہ ادا کر دے اسے اسٹیل ملز مفت دیدوں گا اور جو اسٹیل ملز قرضے کے بدلے لینا چاہے تو اسے ایک ڈالر کے عوض حوالے کر دوں گا۔

مفتاح اسماعیل کا کہنا تھا کہ اسٹیل ملز بند پڑی ہے پیسہ تنخواہوں پر ضائع ہو رہا ہے ایسی مل کو حکومت اپنے پاس کیوں رکھے گی ہم نے پاکستان سٹیل ملزاور پی آئی اے کی نجکاری کی کوشش کی ہے مگر ہم ایسا نہیں کر سکے، پاکستان کی زرعی پالیسی میں بنیادی غلطیاں ہیں، ان کا جائزہ لینے کی ضرورت ہے،۔

مشیر خزانہ نے مزید کہا کہ پاکستان کا بجٹ خسارہ بڑھ رہا ہے، آئندہ مالی سال میں بجٹ خسارہ 4.5 فیصد تک رکھنے کی کوشش کی جائیگی، قومی معیشت پر ایک سیمینار سے خطاب کرتے ہوئے انہوں نے کہا ہے کہ اگلا بجٹ ٹیکنوکریٹک نوعیت کا ہوگا، بہتر معاشی انتظام سے ملکی معیشت مزید بڑھے گی، آئندہ مالی سال کیلئے ہم بہتر بجٹ پیش کرنے کی پوزیشن میں آ گئے ہیں۔

مفتاح اسماعیل نے کہا کہ آئندہ مالی سال کا بجٹ 27 اپریل کو پیش کیا جائیگا جو سیاست سے ہٹ کر ہوگا، حکومت نے تمام سیاسی جماعتوں کو مشاورت میں شامل کرنے کا فیصلہ کیا ہے، مسلم لیگ (ن ) نے عوامی نوعیت کا بجٹ پلان کیا ہے تاکہ ووٹرز کی حمایت حاصل کی جا سکے۔