پارلیمنٹ لاجز میں بیت الخلا کی صفائی پر 56 لاکھ روپے کے اخراجات کا انکشاف

ہمیں پتہ ہے یہ لوگ بغیر دستاویزات کے یہاں دکانیں چلا رہے ہیں، ڈپٹی چیئرمین سینیٹ۔ فوٹو؛ فائل

---

سینیٹ کی ہاؤس کمیٹی کے اجلاس میں پارلیمنٹ لاجز میں بیت الخلا کی صفائی پر 56 لاکھ روپے کے اخراجات کا انکشاف ہوا ہے۔

سینیٹ کی ہاؤس کمیٹی کا اجلاس ڈپٹی چیئرمین سلیم مانڈوی والا کی صدارت میں شروع ہوا جس میں پارلیمنٹ لاجز میں غیرقانونی طور پر دکانیں چلانے کا معاملہ زیر بحث آیا، ڈپٹی چیئرمین سینیٹ سلیم مانڈوی والا نے کہا کہ ہمیں پتہ ہے یہ لوگ بغیر دستاویزات کے یہاں دکانیں چلا رہے ہیں، آئندہ جو بھی دکان کا ٹھیکہ لے گا وہ کنٹریکٹ کے تحت لے گا، ہر دفعہ سی ڈی اے کہتا ہے پیسے نہیں ہیں جب کہ وزارت خزانہ کہتی ہے آپ تفصیلات نہیں دیتے اس لیے پیسے نہیں دیے جاتے۔

سلیم مانڈوی والا نے کہا کہ پارلیمنٹ لاجز میں باتھ رومز کی صفائی کے لیے 5.6 ملین روپے خرچ ہوتے ہیں، پارلیمنٹ ہاؤس کے باتھ رومز بھی بہت گندے ہوتے ہیں۔ چیئرمین سی ڈی اے نے کہا کہ آئندہ آپ خود چیک کریں گے، پارلیمنٹ لاجز کے باتھ رومز کی صفائی پرماہانہ ایک ملین سے زائدخرچ کر رہے ہیں۔