فواد چودھری صاحب سائنس میں چودھراہٹ نہیں چلتی

بہتر ہے کہ ٹویٹس کے بجائے پاکستان میں سائنسی تحقیق و فروغ جیسے معاملات پر حقیقی اور سنجیدہ توجہ دیجیے

علیم احمد July 26, 2019

بہتر ہے کہ ٹویٹس کے بجائے پاکستان میں سائنسی تحقیق و فروغ جیسے معاملات پر حقیقی اور سنجیدہ توجہ دیجیے۔ (فوٹو: انٹرنیٹ)

اس بلاگ کے ذریعے میں آپ سے براہِ راست مخاطب ہوں... جی ہاں! آپ سے فواد چودھری صاحب، جو موجودہ وزیر برائے سائنس و ٹیکنالوجی ہیں۔ موہوم سی توقع تھی کہ سائنس اور ٹیکنالوجی کی اہم قومی وزارت پر آپ کی آمد سے کچھ بہتری آئے گی، لیکن یہ توقع اب تک کم و بیش اٹھ چکی ہے۔ ہاں، اتنا ضرور ہے کہ آپ کے مسخاکوں (memes) کی بدولت پاکستانی ذرائع ابلاغ میں لفظ ''سائنس'' کی مقبولیت میں اضافہ ہوا ہے، لیکن اس کے ساتھ سنجیدگی سے زیادہ مضحکہ خیزی کا عنصر وابستہ ہے جو بجائے خود پاکستان میں سائنس اور ٹیکنالوجی کے حقیقی فروغ و ترقی کےلیے ہلاکت خیز حد تک مضر ہے۔

کبھی آپ سائنس سے دلچسپی رکھنے والے پاکستانی نوجوانوں کو کمر کسنے کے بجائے ''بیلٹ پہن لیجئے'' جیسا نادر و نایاب مشورہ دے ڈالتے ہیں:

کامیابی سائینس ہے، نتائج کیلئے حالات چاہئے ہوتے ہیں، آپ کو سائنس یا ٹیکنالوجی سے دلچسپی ہے تو بیلٹ پہن لیجئے، میرا آپ سے وعدہ ہے آپ کو کامیابی کیلئے درکار ماحول میسر ہو گا۔۔ مجھے ای میل کیجئے اور ٹیم میں شامل ہوں۔ [email protected]
— Ch Fawad Hussain (@fawadchaudhry) April 22, 2019

کبھی ٹی وی پروگرام میں فرما دیتے ہیں کہ ہبل اسپیس ٹیلی اسکوپ، سپارکو نے خلاء میں بھیجی تھی:

Ladies and gentlemen, after Rs 55 per kilometer helicopter ride, here are the new pearls of wisdom by our Einsteinonian minister of Science and Technology His Excellency Fawad Chaudhry claiming to have Hubble Telescope sent into the orbit. pic.twitter.com/Yg3F2C2EIW
— Murtaza Solangi (@murtazasolangi) May 6, 2019

جب اس اظہارِ خیال پر سبکی کا سامنا ہوتا ہے تو ان خیالات پر معذرت کرنے کے بجائے اپنے غصے کا سارا ملبہ رویتِ ہلال کمیٹی پر گرا دیتے ہیں:

ایک بہت چھوٹے گروپ کیلئے وسائل مختص کرنے کی بجائے ریاست کو چاہئے کہ تمام مساجد میں امام مساجد کو گریڈ 14 تا 16 نوکریاں دے، اس سے مخصوص ٹولے کی اجارہ داری بھی ختم ہو گی اور ایک ڈسپلن بھی آۓ گا، اس سلسلے میں صوبائ وزراء اعلیٰ کو اپنی ذمہ داریاں پوری کرنی چاھئیں۔
— Ch Fawad Hussain (@fawadchaudhry) May 11, 2019

باوجودیکہ رویتِ ہلال کے معاملے پر نہ صرف پاکستان بلکہ دنیا بھر سے علماء اور ماہرینِ فلکیات کے مابین عشروں سے بحث جاری ہے، آپ جس انداز سے رویتِ ہلال کے بارے میں تبصرے فرماتے ہیں، انہیں عامی اور عامیانہ تو کہا جاسکتا ہے لیکن سلجھا ہوا اور سنجیدہ ہر گز نہیں۔ پھر آپ پانچ سالہ قمری کیلنڈر بنانے کےلیے ماہرین کی ایک ٹیم تشکیل دے دیتے ہیں:

Ministry of Science n Tech Committee to resolve #moonsighting controversy constituted pic.twitter.com/LknTHNOsOe
— Ch Fawad Hussain (@fawadchaudhry) May 7, 2019

لیکن یہیں پر نہیں رکتے بلکہ بڑی عجلت میں ''رویتِ ہلال ایپ'' بھی بنوا لیتے ہیں، حالانکہ اس قسم کی درجنوں ایپس ''گوگل پلے اسٹور'' پر پہلے سے موجود ہیں۔ صرف صحیح کی ورڈ استعمال کرکے تلاش کرنے کی ضرورت ہے۔ رویتِ ہلال پر مختلف عالمی ویب سائٹس بھی برسوں سے کام کررہی ہیں جنہیں دیکھنا آپ کو بالکل بھی گوارا نہیں... شاید آپ اُمتِ مسلمہ کے نئے ''سائنسی ہیرو'' بننا چاہتے ہیں۔

کبھی لیب کوٹ پہن کر سائنسدان بننے کی ایکٹنگ کرتے ہوئے، ایک عجیب و غریب قسم کی ویڈیو کلپ شیئر کرا دیتے ہیں:

This man is all about science. Who can it be? Coming soon.#comingsoon #Exclusive #interview #TheCurrent pic.twitter.com/CeJOl9Vynv
— The Current (@TheCurrentPK) May 14, 2019

دریں اثناء آپ کراچی تشریف لاتے ہیں اور جامعہ کراچی کے عالمی مرکز برائے کیمیائی و حیاتی علوم (آئی سی سی بی ایس) میں پروفیسر ڈاکٹر عطاء الرحمان کے ہمراہ پریس کانفرنس بھی کرتے ہیں۔ اگرچہ اس پریس کانفرنس کا مقصد، سائنس و ٹیکنالوجی کے بارے میں حکومتی وژن سے متعلق میڈیا کو آگاہی دینا ہے لیکن پوری پریس کانفرنس پر ایک غیر سنجیدہ ماحول طاری رہتا ہے۔ ڈاکٹر عطاء الرحمان کو آپ بولنے ہی نہیں دیتے اور وہ کسی کلرک کی طرح بار بار آپ کو کاغذ پر لکھی ہوئی عبارت دکھاتے جاتے ہیں... کیا پاکستان کے معزز ترین سائنسدان کے ساتھ اس طرح کا رویہ آپ کو زیب دیتا ہے؟ (راقم اس پریس کانفرنس کا عینی شاہد ہے۔)

پوری پریس کانفرنس میں واحد قابلِ ذکر اعلان یہ کرتے ہیں کہ اگست 2019 کو پاکستان میں ''سائنس کے مہینے'' کے طور پر منایا جائے گا، اور بس۔

آپ کے پاس ٹیکنالوجی کاروبار کا آئیڈیا ہے، آپ کو لگتا ہے،آئیڈیا میں دم ہے، جولائ میں اپنا آئیڈیا وزارات سائینس و ٹیکنالوجی کو رجسٹر کروائیں اگر ہمارے ماھرین بھی آپ کے آئیڈیا سے متاثر ہوئے تو ہم آپ کے آئیڈیا کو ستر سے سو فیصد تک سرمایہ دیں گے ، تیاری پکڑیں #PakScienceFair2019
— Ch Fawad Hussain (@fawadchaudhry) May 15, 2019

جب آپ سے سوال کیا جاتا ہے کہ پاکستان سائنس فاؤنڈیشن (پی ایس ایف) جیسے اہم قومی ادارے میں اب تک نئے چیئرمین کی تقرری کیوں نہیں کی گئی؟ تو آپ ''شکر ہے پہلا سائنسی سوال تو آیا،'' کہہ کر اس سوال کا گول مول جواب دے دیتے ہیں؛ اور چند منٹ بعد ہی وہاں سے چل دیتے ہیں۔ (نتیجہ یہ ہے کہ آج تک، اس بات کو دو ماہ گزر جانے کے باوجود، پاکستان سائنس فاؤنڈیشن کو ''قائم مقام چیئرمین'' ہی کی ماتحتی میں چلایا جارہا ہے۔)

سائنس و ٹیکنالوجی کی وزارت میں آپ کو تین ماہ پورے ہونے والے ہیں لیکن اس پورے عرصے میں آپ شاید پاکستان سائنس فاؤنڈیشن کے ہیڈ آفس کا ایک بار بھی دورہ نہیں کرتے؛ اور نہ ہی یہ جاننے میں کوئی دلچسپی لیتے ہیں کہ اسی ادارے میں ''سائنس پاپولرائزیشن وِنگ'' کا مینڈیٹ تبدیل کرنے کی تیاریاں ہورہی ہیں۔ حالانکہ پاکستان میں سائنس کو اسکول کی سطح پر مقبولِ عام بنانے کے جتنے منصوبوں کا تذکرہ آپ کرتے رہتے ہیں، ان میں سے بیشتر پر اسی سائنس پاپولرائزیشن وِنگ میں برسوں (بلکہ عشروں) سے کام ہورہا ہے۔ (اگر کبھی فرصت ملے تو وزیراعظم سیکریٹریٹ کے عین سامنے واقع، پاکستان سائنس فاؤنڈیشن کے صدر دفتر چلے جائیے گا اور ان کے ''سائنس کاروان'' کی بسیں بھی دیکھ لیجیے گا۔)

پاکستان میں سائنس کی ایک طویل تاریخ ہے لیکن آپ اپنی ٹویٹس سے بار بار یہ تاثر دیتے ہیں جیسے آپ کے وزیرِ سائنس بننے سے پہلے اس ملک میں سائنس و ٹیکنالوجی کا کوئی پرسانِ حال نہیں تھا۔ خدارا! اپنی مقبولیت کے بل بوتے پر وطنِ عزیز کی سائنسی تاریخ چھپانے اور مسخ کرنے کی کوشش نہ کیجیے۔

جنرل مشرف کے زمانے میں ڈاکٹر فرید ملک، پاکستان سائنس فاؤنڈیشن کے چیئرمین تھے جنہوں نے ''ٹیکنالوجی بیسڈ ڈیویلپمنٹ'' (ٹی بی ڈی) کے نام سے ایک اہم منصوبے اور وژن پر کام شروع کیا تھا۔ اگر زحمت نہ ہو تو ذرا اس کا مطالعہ بھی کرلیجیے گا، آپ کے کام آئے گا۔

پاکستان کونسل فار سائنٹفک اینڈ انڈسٹریل ریسرچ (پی سی ایس آئی آر) کا دعویٰ ہے کہ اس نے گزشتہ ساٹھ پینسٹھ سال میں 800 کے لگ بھگ پیٹنٹس حاصل کیے ہیں۔ یہ بہت بڑی تعداد ہے، لیکن کیا وجہ ہے کہ ان پیٹنٹس سے ہماری مقامی صنعت میں کوئی خاص فائدہ نہیں اٹھایا گیا؟ کہیں ایسا تو نہیں کہ یہ پیٹنٹس صرف کاغذات کا پیٹ بھرنے کےلیے حاصل کیے گئے ورنہ صنعتی نقطہ نگاہ سے ان کی کوئی اہمیت نہیں؟ ان سنجیدہ سوالوں کے جوابات تلاش کرنے اور پی سی ایس آئی آر کو پاکستان کی صنعتی ترقی کے ساتھ بہتر طور پر مربوط کرنے کی ضرورت ہے۔ یہ نکات اب تک آپ کی نگاہِ التفات کے منتظر ہیں۔

کبھی فرصت ملے تو فیصل آباد میں زرعی یونیورسٹی، ایوب ایگریکلچر ریسرچ انسٹی ٹیوٹ، نیاب اور نبجی وغیرہ جیسے زرعی تحقیقی اداروں کا دورہ بھی کرلیجیے گا کیونکہ یہی وجہ مقامات ہیں جہاں سے آپ کو پائیدار زرعی ترقی کے حوالے سے بہترین مشورے مل سکتے ہیں۔ لیکن کیا آپ کو فرصت ملے گی؟

اور ہاں، یاد آیا! نبجی (NIBGE) فیصل آباد ہی میں برسوں پہلے کوئلے میں موجود سلفر اور راکھ کی مقدار کم کرنے کا ایک تحقیقی منصوبہ بہت کامیابی سے مکمل کیا گیا، لیکن وہ بھی وقت کی گرد تلے کہیں دب گیا۔ ذرا جھاڑ پونچھ کر اسے بھی کہیں سے نکلوا لیجیے گا، پاکستان کے کام آسکتا ہے۔

پاکستان میں سائنسی تحقیق ہو تو رہی ہے لیکن بہت بکھرے ہوئے، غیر منظم اور غیر سائنسی انداز میں۔ حال یہ ہے کہ اگر پاکستان کے ایک تحقیقی ادارے میں کوئی تحقیقی کام ہورہا ہے، تو اس کی خبر دوسرے سائنسی اداروں تک کو نہیں... بھلا ہمہ شمہ کو اس بارے میں کیا پتا چلے گا۔ ضرورت اس امر کی ہے کہ تحقیق میں مصروف پاکستانی اداروں اور تحقیق کاروں کا ایک جامع ڈیٹابیس مرتب کیا جائے، بلکہ وطنِ عزیز میں جاری سائنسی تحقیقی سرگرمیوں کو بھی اس انداز سے منظم و مربوط کیا جائے کہ ان کے بہتر معاشی و معاشرتی ثمرات (socioeconomic benefits) جلد از جلد اور بہتر سے بہتر طور پر حاصل کیے جاسکیں۔ لیکن وہی مرغے کی ایک ٹانگ: کیا آپ ان سب چیزوں کو قابلِ توجہ سمجھتے ہیں؟

وزارتِ سائنس میں آنے سے پہلے آپ کا تعلق اطلاعات و نشریات کی وزارت سے تھا، جبکہ آپ خود بھی میڈیا کے پس منظر ہی سے سیاست میں آئے ہیں۔ پاکستانی صحافیوں کی میڈیا سے واقفیت کا کیا حال ہے؟ یہ آپ بخوبی جانتے ہوں گے۔ اسی بناء پر امید تھی کہ وزیرِ سائنس بننے کے بعد آپ کچھ نہ کچھ ایسے اقدامات ضرور کریں گے جن کے ذریعے میڈیا میں سائنس رپورٹنگ کو بہتر بنایا جائے گا، اور وہ افراد/ ادارے جو پاکستان میں سائنس کے عوامی ابلاغ کا کام کررہے ہیں، ان کےلیے سہولیات پیدا کی جائیں گی۔ لیکن یوں لگتا ہے جیسے آپ کو نہ تو سائنسی صحافت (سائنس جرنلزم)، عوامی سائنسی ابلاغ (پبلک کمیونی کیشن آف سائنس) اور فروغِ سائنس (سائنس پاپولرائزیشن) جیسے الفاظ کی کوئی خبر ہے اور نہ ہی ان کے بارے میں جاننے کی کوئی فکر۔

دنیا کے تمام ترقی یافتہ ممالک میں اگر ایک طرف ان کے تحقیقی ادارے سنجیدہ تحقیق میں مصروف ہوتے ہیں تو دوسری جانب وہاں کا میڈیا بھی اپنے یہاں ہونے والی ان سائنسی تحقیقات اور دوسری متعلقہ سرگرمیوں کو عوام الناس کے سامنے پیش کرتا ہے، سائنسی تصورات کو ان کےلیے عام فہم بناتا ہے، سائنس کے بارے میں عوام کی اجنبیت دور کرتا ہے اور اپنے معاشرے میں ''سائنس کلچر'' پروان چڑھانے میں کلیدی کردار ادا کرتا ہے۔ توقع تھی کہ آپ کے وزیرِ سائنس بننے کے بعد میڈیا اور سائنس کے حوالے سے کچھ نہ کچھ ضرور ہوگا... افسوس کہ اس بارے میں آپ کا اب تک کا رویہ مایوس کن حد تک سرد مہری پر ہی مبنی رہا ہے۔

مجھے آپ سے کوئی دشمنی نہیں۔ میں نے جو کچھ بھی لکھا وہ ایک محب وطن پاکستانی کی حیثیت سے میرا ذاتی نقطہ نگاہ ہے۔ تبدیلی سرکار کا یہ چلن میری سمجھ سے باہر ہے کہ دوسرے ملکوں میں ہونے والی سائنسی ترقی کی مثالیں تو دی جاتی ہیں لیکن جب پاکستان میں سائنسی ترقی کا معاملہ درپیش ہوتا ہے تو فوراً غربت کا رونا شروع ہوجاتا ہے۔ اس طرزِ عمل کو میں منافقت نہ کہوں تو اور کیا کہوں؟

یقین کیجیے کہ آپ کی تمام باتوں پر صبر (اور دل پر جبر) کرکے خاموش بیٹھا تھا کہ آپ کی ایک تازہ ٹویٹ نے جیسے تن بدن میں آگ لگا دی:

مجھے بہت خوشی ہے کہ پہلے پاکستانی خلاباز کیلئے سلیکشن پراسس اگلے سال 2020 سے شروع ہو رہا ہے، پہلے مرحلے میں50 خلانورد شارٹ لسٹ کریں گے ان میں سے25 فائنل مرحلے میں جائینگے اور 2022 میں ہم انشاللہٰ پہلا پاکستانی خلاࣿ میں جائیگا، یہ پاکستان کی سپیس پروگرام کیلئےتاریخ ساز اقدام ہو گا
— Ch Fawad Hussain (@fawadchaudhry) July 25, 2019

اب یا تو آپ مذاق کررہے ہیں یا پھر دسمبر 2017 میں پاک فضائیہ کے سربراہ، ایئر مارشل سہیل امان مذاق کررہے تھے جب انہوں نے ''ایئرٹیک 17'' کانفرنس کی افتتاحی تقریب سے خطاب کرتے ہوئے فرمایا تھا کہ پاکستان، چین کے تعاون سے، اگلے دو سال میں اپنے خلا نوردوں کو خلاء میں بھیجنے کےلیے تیار ہوگا۔

خلائی سیاحت کا معاملہ الگ ہے، لیکن جہاں تک خلا نوردوں کو خلا میں بھیجنے کی بات ہے تو یاد رہنا چاہیے کہ اس مقصد کےلیے انتہائی سخت جسمانی اور پیشہ ورانہ تربیت درکار ہوتی ہے جو اس وقت پاکستان میں صرف پاک فضائیہ کے ماہر ترین ''ٹیسٹ پائلٹس'' ہی نے حاصل کر رکھی ہے۔ ایئر مارشل سہیل امان نے تقریباً دو سال پہلے جب پاکستانی خلا نوردوں کو خلا میں بھیجنے کی بات کی تھی، تو اس کے پیچھے پاک فضائیہ کی یہی پیشہ ورانہ مہارت پہلے سے موجود تھی۔ شاید آپ نے ٹویٹ کرنے سے پہلے اس بارے میں گوگل کرنے کی زحمت بھی گوارا نہیں کی۔

خبروں میں رہنے کا شوق کسے نہیں ہوتا؟ لیکن اپنے اس شوق کی تکمیل کےلیے پاک فضائیہ کو یکسر نظرانداز کرتے ہوئے خود کو ''پاکستانی خلائی پروگرام کا نیا مسیحا'' ثابت کرنے کی کوشش کرنا بھی قابلِ تعریف عمل نہیں۔

معذرت کے ساتھ، اگر آپ کو پاکستان کے خلائی پروگرام کو حقیقی معنوں میں کوئی ترقی دینی ہے تو گزشتہ تیس پینتیس سال سے التوا میں پڑے ہوئے ''اسپیس لانچ وہیکل'' (ایس ایل وی) کے منصوبے پر کام کروائیے۔ اپنے لڑکپن سے مختلف نمائشوں میں سپارکو کے اسٹال پر اس بے چارے ''ایس ایل وی'' کا صرف ننھا منا سا ماڈل ہی دیکھتا آرہا ہوں۔

بات بہت طویل ہوچکی ہے، مزید طویل ہوسکتی ہے۔ لیکن ایک مخلصانہ مشورے کے ساتھ اپنی تحریر ختم کروں گا: برائے مہربانی اپنے ارد گرد بیٹھے ہوئے خوشامدیوں سے نجات حاصل کیجیے کیونکہ ان کی چاپلوسی آپ کو سائنس کے معاملے میں بھی چودھراہٹ کا مظاہرہ کرنے پر مجبور کررہی ہے... لیکن جناب! سائنس ایک سنجیدہ شعبہ ہے جس میں چودھراہٹ نہیں چلتی۔

نوٹ: ایکسپریس نیوز اور اس کی پالیسی کا اس بلاگر کے خیالات سے متفق ہونا ضروری نہیں۔

اگر آپ بھی ہمارے لیے اردو بلاگ لکھنا چاہتے ہیں تو قلم اٹھائیے اور 500 سے 1,000 الفاظ پر مشتمل تحریر اپنی تصویر، مکمل نام، فون نمبر، فیس بک اور ٹوئٹر آئی ڈیز اور اپنے مختصر مگر جامع تعارف کے ساتھ [email protected] پر ای میل کردیجیے۔