خیبر پختونخوا میں شیڈول فور میں شامل 26 افغان باشندے افغانستان فرار

افغان باشندوں کو مشکوک سرگرمیوں پر فہرست میں شامل کیا گیا تھا فوٹو:فائل

---

خیبر پختونخوا میں فورتھ شیڈول میں شامل 26 افغان باشندوں کے افغانستان فرار ہونے کا انکشاف ہوا ہے۔

خیبر پختونخوا میں شیڈول فور میں شامل 378 افراد میں 26 افغان باشندے بھی شامل ہیں جنہیں 2008 سے2019 کے دوران صوبے کے مختف اضلاع سے سکیورٹی اداروں کی سفارش پر شیڈول فور میں شامل کیا گیا تھا۔

اعلی پولیس آفیسر کے مطابق محکمہ داخلہ ، ڈی سی پشاور ، سی ٹی ڈی حکام پر مشتمل اجلاس میں یہ رپورٹ سامنے آئی کہ فورتھ شیڈول میں شامل 26 افغان باشندوں کے پاکستان سے افغانستان فرار ہونے کا انکشاف ہوا ہے۔

ذرائع کے مطابق محکمہ داخلہ خیبر پختونخوا نے پولیس اور سی ٹی ڈی حکام سے شیڈول فور میں شامل افغان باشندوں کی تفصیلات طلب کیں جس سے معلوم ہوا کہ 26 افغان باشندے پاکستان سے افغانستان فرار ہوئے ہیں۔ ان کا نام فہرست میں رکھنے یا نکالنے پر غور کے لیے محکمہ پولیس اگلے اجلاس میں فیصلہ کرے گا۔

افغان باشندوں کو مشکوک سرگرمیوں پر فہرست میں شامل کیا گیا تھا لیکن بعد میں ان پر نظر نہیں رکھی گئی اور نہ ہی ان کے بیرون ملک جانے کے حوالے سے تحریری طور پر ان کو پابند بنایا گیا۔