کورونا چینی ڈاکٹرز کی ٹیم مدد کیلیے پاکستان پہنچ گئی

چینی ٹیم طبی سامان اور آلات بھی ساتھ لائی، 2ماہ قیام کرے گی: آئی ایس پی آر۔ فوٹو : فائل

---

چین نے ایک بار پھر پاکستان کے مثالی دوست ہونے کا بھرپور ثبوت دیتے ہوئے اپنی میڈیکل ٹیم بھیج دی، میڈیکل ٹیم دو مہینے قیام کرکے کورونا وبا سے نمٹنے میں پاکستان کی مدد کرے گی۔

آئی ایس پی آر کے مطابق چینی ڈاکٹرز کی ٹیم میڈیکل سامان اور آلات لے کر پاکستان پہنچ گئی، میجر جنرل ہو آنگ چنگ عھان کی سربراہی میں میڈیکل ٹیم 2 خصوصی طیاروں میں پاکستان پہنچی۔

ترجمان کے مطابق پاکستان پہنچنے پر چیئرمین جوائنٹ چیفس آف اسٹاف کمیٹی جنرل ندیم رضا نے چینی ٹیم کو خوش آمدید کہا، نیشنل کمانڈ اینڈ آپریشن سینٹر کے قومی کوآرڈی نیٹر لیفٹننٹ جنرل حمود الزمان بھی چینی ٹیم کے استقبال کیلئے موجود تھے۔

آئی ایس پی آر کے مطابق چینی ڈاکٹرز کی ٹیم کورونا وباء کے علاج کا خصوصی تجربہ رکھتے ہیں۔