پاک بھارت مشترکہ فلمسازی کا ہمیں زیادہ فائدہ ہوسکتا ہے نرما

بھارتی فلموں کی نمائش سے صرف ایک مخصوص طبقہ کو فائدہ ہو رہاہے ۔ فوٹو: فائل

---

اداکارہ نرما نے کہا ہے کہ پاکستان اور بھارت کی مشترکہ فلمسازی کا ہمیں زیادہ فائدہ ہوسکتا ہے۔

انھوں نے کہا کہ بھارتی فلموں کی نمائش سے صرف ایک مخصوص طبقہ کو فائدہ ہو رہاہے مگر اگر دونوں ممالک میں کو پروڈکشن شروع ہوجائے تو اس کے بہتر نتائج سامنے آسکتے ہیں ۔ انھوں نے ان خیالات کا اظہار ''ایکسپریس'' سے بات چیت کرتے ہوئے کیا ۔



نرما نے کہا کہ میں بھارتی فلموں کی نمائش کے بالکل خلاف نہیں بلکہ ان کی نمائش سے سینما انڈسٹری کو فروغ ملا ہے، سینمائوں میں فلمیں دیکھنے کا رواج دوبارہ شروع ہوگیا ہے۔ اب ہمیں اس کا فائدہ اٹھاتے ہوئے پاک بھارت کو پروڈکشن کرنے کی منصوبہ بندی کریں ۔ اگر ایسا ہوجائے تو ہمارے تکنیک کاروں کو جدید فلم میکنگ کے بارے میں تربیت ملے گئی اور پھر اس کے ساتھ بین الاقوامی مارکیٹ تک بھی رسائی حاصل کرسکتے ہیں۔ نرما نے کہا کہ فلم میکنگ میں نئے آنیوالے تازہ ہوا کا جھونکا ثابت ہوئے ہیں۔