لیڈی ریڈنگ ہسپتال پشاور میں پولیس اہلکار پر تشدد پر 2 میڈیکل ریپس گرفتار

پولیس اہلکار نے دوا ساز کمپنی کے نمائندوں کو ڈاکٹر کے کمرے میں داخل ہونے سے منع کیا تھا

---

پشاور کے لیڈی ریڈنگ ہسپتال میں میڈیکل ریپس آپے سے باہر ہو گئے ۔

ڈیوٹی پر موجود پولیس اہلکار نے دوا ساز کمپنی کے نمائندوں کو مریضوں کے اوقات میں ڈاکٹر کے کمرے میں داخل ہونے سے منع کیا تو انہوں نے پولیس اہلکار پر لاتوں اور مکوں کی برسات کر دی۔

دو میڈیکل ریپس نے ذیشان نامی پولیس کانسٹیبل کو بری طرح تشدد کا نشانہ بنایا۔ پولیس نے واقعے کے بعد کارروائی کرتے ہوئے میڈیکل ریپس کو گرفتار کر لیا ۔

پولیس کے مطابق میڈیکل ریپس کی شناخت زین اور عرفان کے نام سے ہوئی ، جنہیں کابلی پولیس اسٹیشن میں گرفتار کر کے حوالات میں بند کر دیا گیا ۔ واقعے کی ویڈیو سوشل میڈیا پر وائرل ہوگئی ، جبکہ ملزمان کے خلاف مقدمہ درج کر کے تفتیش شروع کر دی گئی۔