پاکستان میں ٹیلنٹ نہیں وسائل کی کمی ہےعلی ظفر

بھاری سرمایہ کاری کی جائے تو صورتحال میں تبدیلی آسکتی ہے۔فوٹو:فائل

---

گلوکار علی ظفرنے کہا ہے کہ پاکستان فلم انڈسٹری کو اب شاید ہی کبھی عروج حاصل ہو۔

یہاں ٹیلنٹ کی کوئی کمی نہیں' اصل مسئلہ وسائل کی کمی کا ہے جس کیوجہ سے عالمی معیار کی فلمیں نہیں بن پاتیں' حکومت لالی ووڈ انڈسٹری پر توجہ دے اور انٹرٹینمنٹ اینڈ آرٹس کے لیے بجٹ رکھے'بھاری سرمایہ کاری کی جائے تو صورتحال میں تبدیلی آسکتی ہے۔''ایکسپریس '' سے گفتگو کرتے ہوئے علی ظفر نے کہاکہ وہ اِن دنوں اپنا نیا البم ریلیز کرنے کی تیاریوں میں مصروف ہوں، یہ البم پاکستان میں تیار ہو رہا ہے لیکن اسے بھارت کی بڑی میوزیکل کمپنی ریلیز کرنیوالی ہے۔ انھوں نے کہا کہ میں اچھے میوزک پر یقین رکھتا ہوں۔



پھر چاہے وہ کلاسیکل ہو، نیم کلاسیکل ہو یا پوپ، رسیلی اور مدھر آواز کے مالک ان گانوں کی بدولت، آج میرے پرستار پوری دنیا میں موجود ہیں، بالی ووڈ میں جو نام اور مقام حاصل کیا وہ میری لگن اور مسلسل محنت کا نتیجہ ہے۔ بالی ووڈ سے متعلق ان کا کہنا ہے کہ بالی ووڈ ایک ایسی جگہ ہے جو نہ صرف سیکھنے کا موقع دیتی ہے بلکہ میوزک کی دنیا میں نام بنانے میں مدد بھی دیتی ہے۔علی ظفرکے مطابق بالی ووڈ نے انہیں انڈسٹری کے بہترین کمپوزرز کے ساتھ کام کرنے کا موقع فراہم کیا۔ وہ کہتے ہیں کہ فلموں میں گانا ایک بالکل مختلف اور نیا تجربہ تھا جس نے بطور پروفیشنل انھیں آگے بڑھنے اور گروم کرنے میں مدد دی۔