وکیل کی لاہور ہائیکورٹ کی کاپی برانچ میں توڑ پھوڑ ویڈیو سامنے آگئی

ہائیکورٹ سیکیورٹی نے وکیل کو گرفتار کرکے دہشتگردی ایکٹ کے تحت مقدمہ درج کروا دیا

---

چیف جسٹس لاہور ہائیکورٹ کی نصیحت بھی کام نہ آئی نوجوان وکیل نے فیصلہ کی مصدقہ نقل زرا سی تاخیر سے ملنے پر قلم اٹھانے کی بجائے ڈنڈا اٹھا کر کاپی برانچ کے تمام شیشے توڑ دیے۔

ہائیکورٹ سیکیورٹی نے وکیل کو گرفتار کرکے دہشتگردی ایکٹ کے تحت مقدمہ درج کروا دیا۔ ہائیکورٹ کی کاپی برانچ میں مقامی وکیل ماجد جہانگیر نے مصدقہ نقل تاخیر سے ملنے پر کاپی برانچ کے شیشے توڑ ڈالے۔

کل ہی سپریم کورٹ اور لاہور ہائیکورٹ کے چیف جسٹس صاحبان وکلاء کواچھے برتاؤ کی تلقین کررہے تھے۔ ہمارے ملک کی بدقسمتی ہے کہ ان وکیل صاحب کے خلاف بھی کوئی ایکشن نہیں ہوگا pic.twitter.com/4ypk5TFUQ5

— Muhammad Bilal (@Bilal81) October 6, 2021

فوٹیج میں دیکھا جاسکتا ہے کہ وکیل ماجد جہانگیر نے ہاتھ میں ڈنڈا اٹھا رکھا ہے ۔ اس دوران سیکیورٹی اہلکار اسے منع کرتا ہے تو وہ طیش میں آجاتا ہے اور سکیورٹی اہلکار کو پیچھے ہٹنے کا کہتا ہے۔

وکیل ماجد جہانگیر نے ڈنڈے کا بے دریغ استعمال کرکے کاپی برانچ کے تمام شیشے توڑ ڈالے جس کے بعد ہائیکورٹ سکیورٹی نے وکیل کو گرفتار کرلیا۔

قوم یوتھ سے تعلق رکھنے والا ایک وکیل لاہور ہائی کورٹ میں اپنے دل کی بھڑاس نکال رہا ہے 😂🙏 وڈیو نمبر ۱
اگلی ٹویٹ میں پوری وڈیو دیکھیں pic.twitter.com/qmnGeztrWD

— Basit Alvi (@bpk69) October 6, 2021

چیف جسٹس لاہور ہائیکورٹ جسٹس امیر بھٹی نے گزشتہ روز تحفظ وکلا ایکٹ کانفرنس میں وکلا کو ڈنڈا سوٹا اٹھانے کی بجائے قلم اٹھانے پر زور دیا لیکن وکیل صاحب نے سنی ان سنی کردی۔

لاہور ہائیکورٹ کے ترجمان کے مطابق وکیل کو گرفتار کرلیا گیا اور اسکے خلاف دہشت گردی ایکٹ کے تحت مقدمہ درج کروا دیا گیا ہے جبکہ بار کونسل نے اس واقعے کی پر زور مذمت کی ہے اور وکیل ماجد جہانگیر کا وکالت کا لائیسنس بھی معطل کردیا ہے۔

پنجاب بار کونسل نے ایڈووکیٹ ماجد جہانگیر کا لائسنس معطل کرتے ہوئے لائسنس منسوخی کے لیے معاملہ ٹربیونل کو بھجوادیا۔ ہائیکورٹ کے جج کی سربراہی میں تین رکنی ٹربیونل ماجد جہانگیر کا لائسنس منسوخ کرنے سے متعلق فیصلہ کرے گا۔ وائس چیئرمین پنجاب بار کونسل فرحان شہزاد نے کہا کہ ہم نے اپنا کام کردیا اب ٹربیونل نے لائسنس منسوخ کرنا ہے۔

یہ بھی پڑھیں: وکلا کا لاہور میں دل کے اسپتال پر دھاوا

ڈی آئی جی آپریشنز سہیل چوھدری نے کہا کہ ملزم کے خلاف قانونی کارروائی عمل میں لائی جا رہی ہے، کوئی کتنا ہی بااثر کیوں نہ ہو قانون سے بالاتر نہیں ہے، عدالتوں کی سیکورٹی اولین ترجیح ہے جس میں کوئی کوتاہی برداشت نہیں کی جائے گی۔