حکومت کو ٹی ٹی پی سے پابندی اٹھانے کی تجویز دینے پر غور

طالبان کو کچھ ریلیف فراہم کیا جائے تومذاکرات موثرثابت ہوسکتے ہیں۔مذہبی جماعتوں کی تجویز۔ فوٹو: فائل

---

مذہبی جماعتوں میں مذاکرات موثربنانے کیلیے تحریک طالبان سے پابندی اٹھانے کی تجویز زیرغورہے۔

حکومتی کمیٹی سے مذاکرات میں معاملے کواٹھایا جائے گا، حکومت اورطالبان کمیٹیوں کااجلاس آج متوقع ہے جبکہ مولانا یوسف شاہ نے کہاہے کہ قبل ازوقت کچھ نہیں کہا جاسکتا کہ کیاتجاویز دی جائیںگی اورکون سے مطالبات تسلیم کیے جائیں گے، باقاعدہ پہلی ملاقات کے بعدہی صورتحال واضح ہوگی۔ باوثوق ذرائع نے آن لائن کوبتایا کہ حکومت طالبان مذاکرات موثر بنانے کے لیے مذہبی جماعتوں میں یہ تجویز زیرغور آئی ہے کہ اگر کالعدم تحریک طالبان پاکستان پرسے پابندی اٹھالی جائے اور انھیں کچھ ریلیف فراہم کیا جائے تومذاکرات موثرثابت ہوسکتے ہیں۔



اس سلسلے میں حکومتی کمیٹی کارویہ دیکھنے کے بعد پہلے اجلاس میں یہ معاملہ اٹھائے جانے کاامکان ہے۔ ذرائع کے مطابق دونوں مفاہمتی کمیٹیوںکا آج اسلام آبادمیں اجلاس بھی متوقع ہے۔ اس سلسلے میں جب آن لائن طالبان ثالثی کمیٹی کے ترجمان وکوآرڈینیٹرمولانا یوسف شاہ سے رابطہ کیاگیا توانھوں نے بتایاکہ قبل ازوقت کچھ نہیں کہا جاسکتا۔ انھوں نے کہاکہ حکومتی کمیٹی کے اراکین کے رابطے ضرور ہوئے ہیں لیکن یہ بھی کہنا مشکل ہے کہ آج(جمعرات کو) دونوں کمیٹیوں کااجلاس ہوگا یانہیں۔ کیونکہ یوم یکجہتی کشمیرکے حوالے سے ہمارے قائدین کی اپنی بھی مصروفیات ہیں۔