بلوچستان میں گلوبل پارٹنرشپ کے تحت 1493 کنٹریکٹ ٹیچرز کو مستقل کردیا گیا

آج آپ لوگوں کو تقرری کے آرڈر دے کر بے حد خوشی محسوس ہو رہی ہے، وزیراعلی بلوچستان میر عبدالقدوس بزنجو

---

ISLAMABAD: بلوچستان میں گلوبل پارٹنرشپ کے تحت 1493 ٹیچرز کو مستقل کردیا گیا۔

کوئٹہ میں گلوبل پارٹنرشپ کے تحت بھرتی ہونے والے اساتذہ کی مستقل تقرری کی تقریب ہوئی، جس میں وزیراعلی بلوچستان عبدالقدوس بزنجو ، صوبائی وزرا سمیت اپوزیشن اراکین نے بھی شرکت کی۔ گلوبل پارٹنرشپ کے تحت 1493 ٹیچرز کو مستقل کیا جا رہا ہے۔

وزیراعلی بلوچستان میر عبدالقدوس بزنجو نے کہا کہ آج آپ لوگوں کو تقرری کے آرڈر دے کر بے حد خوشی محسوس ہو رہی ہے، ہماری ایک چھوٹی سی کوشش سے 14 سو سے زیادہ لوگوں کو روزگار مل رہاہے۔

انہوں نے کہا کہ اللہ تعالیٰ کے فضل سے آج اس وعدے کی تکمیل ہو رہی ہے، کنٹریکٹ ملازمین کو مستقل بنیادوں پر بھرتی کرنے کا وعدہ کیا تھا، ہماری حکومت لوگوں کے روزگار کو تحفظ دینے کے لیے اپنا بھرپور کردار ادا کریگی۔