گلوبل میڈیا واچ ڈاگ کا بھارت سے کشمیری صحافی کو رہا کرنے کا مطالبہ

صحافیوں نے پولیس کی طرف سے ہراساں کیے جانے اور دھمکیوں کے بارے میں تشویش کا اظہار کیا ہے—فوٹو

---

لاہور: امریکا میں قائم کمیٹی ٹو پروٹیکٹ جرنلسٹس نے بھارت سے مطالبہ کیا ہے کہ وہ مقبوضہ کشمیر سے زیر حراست ایک صحافی کو فوری طور پر کرے۔

پولیس نے صحافی عالم سجاد کو بھارتی حکمرانوں کے خلاف احتجاج کا ویڈیو کلپ اپ لوڈ کرنے پر گرفتار کیا تھا۔

میڈیا واچ ڈاگ نے کہا کہ وہ ایک آزاد صحافی اور میڈیا کے طالب علم سجاد گل کی گرفتاری سے 'بہت پریشان' ہے۔

مزیدپڑھیں: مقبوضہ کشمیر میں سینئر صحافی شجاعت بخاری کو قتل کردیا گیا

ان کے اہل خانہ نے بتایا کہ بھارتی فوجیوں نے بدھ کی رات سجاد گل کو شمال مشرقی گاؤں شاہ گنڈ میں اس کے گھر سے اٹھایا اور بعد میں اسے پولیس کے حوالے کر دیا۔

#Kashmir: CPJ is deeply disturbed by reports that Kashmiri journalist @SajadGUL_ was arrested days after posting a video of a protest on social media. Authorities must immediately release Gul and drop their investigations related to his journalistic work.https://t.co/PuaSpMRZwh https://t.co/fR9Qof29eI

— CPJ Asia (@CPJAsia) January 7, 2022

سجاد گل نے پیر کے روز ایک کشمیر نوجوان کے قتل کے خلاف احتجاج کرنے والے خاندان کے افراد اور رشتہ داروں کی ویڈیو پوسٹ کی تھی۔

کمیٹی ٹو پرٹیکٹ جرنلسٹس نے سماجی روابط کی ویب سائٹ ٹوئٹر پر کہا کہ وہ بھارتی حکام سے مطالبہ کرتے ہیں کہ 'ان کے صحافتی کام سے متعلق اپنی تحقیقات ختم کردیں'۔

یہ بھی پڑھیں: مقبوضہ کشمیر میں خاتون صحافی ریاست مخالف سرگرمیوں کے الزام میں گرفتار

صحافیوں نے پولیس کی طرف سے ہراساں کیے جانے اور دھمکیوں کے بارے میں تشویش کا اظہار کیا ہے۔

خطے میں صحافیوں کی ایک منتخب تنظیم کشمیر پریس کلب نے بھی متعدد مرتبہ بھارتی حکومت پر زور دیا ہے کہ وہ انہیں آزادانہ طور پر رپورٹنگ کرنے کی اجازت دے، بھارتی سیکیورٹی ایجنسیاں پریس کو دبانے کے لیے جسمانی تشدد، دھمکیوں اور سمن کا استعمال کر رہی ہیں۔