چوہڑ جمالی سجاول روڈ پر ٹریفک حادثہ 2 افراد جاں بحق

حادثہ سجاول روڈ پر پیش آیا، زیارت کیلیے جانیوالے کراچی کے رہائشی ذہنی مریض نوجوان کو تیز رفتار کار نے کچل دیا۔ فوٹو: فائل

---

چوہڑ سجاول روڈ پر موری کے قریب 2 کاروں اور موٹرسائیکل کے حادثے میں 2 افراد جاں بحق۔

گلشن اقبال کراچی کے رہائشی زیارت کے لیے جا رہے تھے کہ چوہڑ سجاول روڈ پر موری کے قریب چوہڑ جمالی سے جانے والی موٹرسائیکل کو کار نے ٹکر مار دی جس کے نتیجے میں چوہڑ جمالی کا رہائشی 35 سالہ اللہ ڈنو ولد دلبر شیخ شدید زخمی ہو گیا جسے کار کے مالک علاج کے لیے ہیلتھ سینٹر چوہڑ جمالی لے گئے ۔

بعدازاں کار میں بیٹھا کراچی کا رہائشی نوجوان جو نفسیاتی مریض بتایا جاتا ہے کار سے اتر کر چیختا چلاتا سڑک کی طرف بھاگنے لگا تو سامنے سے آنے والی تیز رفتار کار نے اسے کچل دیا جس کے نتیجے میں وہ موقع پر ہی ہلاک ہوگیا۔دوسری جانب موٹرسائیکل سوار الھ ڈنو شیخ کی حالت نازک ہونے کے باعث اسے کراچی ریفر کیا جارہا تھا کہ وہ زخموں کی تاب نہ لاتے ہوئے راستے میں ہلاک ہوگیا۔ پولیس نے 2 کاریں اور موٹرسائیکل تحویل میں لے کر تفتیش شروع کر دی جبکہ آخری اطلاعات تک واقعے کا کوئی بھی مقدمہ درج نہ ہوسکا۔