باحجاب طالبہ کو ہراساں کرنے کا معاملہ شبانہ اعظمی کا موقف بھی سامنے آگیا

طالبہ کی بہادری نے دنیا بھر کے لوگوں کی توجہ اپنی جانب مبذول کروالی فوٹوفائل

---

ISLAMABAD: بھارتی ریاست کرناٹک میں باحجاب طالبہ کو ہندو انتہا پسندوں کی جانب سے ہراساں کیے جانے کے معاملے پر اداکارہ شبانہ اعظمی نے بھی اپنا موقف دیا ہے۔

شبانہ اعظمی نے چند لڑکیوں کی تصویر ٹوئٹر پر شیئر کی جس میں لڑکیاں بھارتی ترنگے کا حجاب پہنی ہوئی ہیں۔ اداکارہ نے تصویر کے ساتھ پیغام میں لکھا ''ان کو ان کے اپنے کھیل میں ہرانے کے بارے میں کیا خیال ہے؟''۔ اس پیغام میں شبانہ اعظمی نے بھارتی سیاستدان اور کانگریس کے رہنما راہول گاندھی اور پریانکا گاندھی کو بھی ٹیگ کیا۔

How about beating them at their own game ??⁦@RahulGandhi⁩ ⁦@priyankagandhi⁩ pic.twitter.com/Jxyg6NfRQZ

— Azmi Shabana (@AzmiShabana) February 9, 2022

واضح رہے کہ چند روز قبل بھارتی ریاست کرناٹک کے ایک کالج میں ایک نہتی باحجاب طالبہ کی ویڈیو سوشل میڈیا پر وائرل ہوئی تھی۔ جس میں حجاب میں ملبوس طالبہ کالج میں جیسے ہی داخل ہوتی ہے درجنوں انتہاپسند ہندو طلبا گلے میں زعفرانی رنگ کا مفلر پہنے طالبہ کو ہراساں کرتے ہیں اور 'جے شری رام' کا نعرہ لگاتے ہیں۔

یہ بھی پڑھیں: بھارتی اداکار نے ہندو انتہا پسندوں کے سامنے ڈٹ جانیوالی طالبہ کو شیرنی قرار دیدیا

لیکن طالبہ ان انتہاپسندوں سے ڈرنے کے بجائے جواب میں نعرہ تکبیر بلند کرتی ہوئی کالج کی عمارت کی جانب بڑھتی ہے۔ طالبہ کی اس بہادری نے دنیا بھر کے لوگوں کی توجہ اپنی جانب مبذول کروالی اور سوشل میڈیا پر کئی لوگوں نے بہادر طالبہ کی جرات کی تعریف کرتے ہوئے جنونی ہندوؤں کے اس طرز عمل کے خلاف آواز اٹھائی۔