پاکستان میں بکری کے بچے کے 48 سینٹی میٹر لمبے کان

صوبہ سندھ کی مقامی نسل لیڑی سے تعلق رکھنے والا سمبا 48 سینٹی میٹر طویل کانوں کا حامل ہے۔ فوٹو: فائل

---

ISLAMABAD: ایک ماہ سے بھی کم عمر کے بکری کے بچے کے طویل ترین کان ہیں جس کی نسل سندھ سے تعلق رکھتی ہے۔

صوبہ سندھ کے محمد حسن ناریجو کے فارم میں پیدا ہونے والے اس بچے کا نام 'سمبا' رکھا گیا ہے۔ پانچ جون کو پیدا ہونے والے بکری کے اس بچے کے کان غیرمعمولی طور پر لمبے ہیں جو پورے قد سے کھڑے ہونے کے باوجود زمین سے لگتے ہیں۔ یہی وجہ ہے کہ 19 انچ (48 سینٹی میٹر) طویل کان والے سمبا کا نام گنیز بک آف ورلڈ ریکارڈ میں درج کروایا جائے گا۔



محمد حسن ناریجو نے ایک ٹی وی پروگرام میں بتایا کہ لیڑی نسل سے تعلق رکھنے والی جانوروں کے کان طویل ہوتے ہیں لیکن سمبا کے کان غیرمعمولی طویل ہیں اور یہی وجہ ہے کہ شاید یہ دنیا کے سب سے لمبے کانوں کو والا بکرا بن سکتا ہے۔



محمد حسن نے بتایا کہ نشوونما کے ساتھ ساتھ اس کے کان مزید لمبے ہوتے جائیں گے۔ سعودی عرب میں حجازی نسل کے بکرے کے کانوں کی زیادہ سے زیادہ لمبائی 43 سینٹی میٹر نوٹ کی گئی ہے جبکہ سمبا کے کانوں کی لمبائی 48 سینٹی میٹر ہے جو ایک ریکارڈ بھی ہے۔



انہوں نے بتایا کہ سمبا کی صفائی اور دیکھ بھال پر ایک ملازم مامور ہے جبکہ اسے رکھنے کے لیے خاص پنچرہ بنایا گیا ہے۔ سمبا کے سونے کے لیے ایک بستر بھی تیار کیا گیا ہے۔

محمد حسن ناریجو نے بتایا کہ سعودی عرب سے کئی افراد نے اسے خریدنے میں دلچسپی کا اظہار کیا ہے لیکن فی الحال وہ گنیز بک آف ورلڈ ریکارڈ میں اس کا نام شامل کرانا چاہتے ہیں۔