پاکستانیوں کی سخاوت نرم دلی اور مہمان نوازی بے مثال ہے جرمن سفیر

جانتا ہوں اسلام آباد کا یہ نظارہ کل صبح سے میں نہ دیکھ پاؤں گا، برن ہارڈ شلاگ ہیک

---

جرمن سفیر برن ہارڈ شلاگ ہیک نے پاکستان میں اپنی تعیناتی کے آخری روز پیغام میں پاکستانیوں کی سخاوت، نرم دلی اور مہمان نوازی کو بے مثال قرار دیتے ہوئے کہا ہے کہ یہی خوبیاں سچی دوستی کی بنیادی اقدار ہیں۔

برن ہارڈ شلاگ ہیک نے جمعرات کی علی الصبح اسلام آباد میں اپنی تعیناتی کے آخری دن پارلیمنٹ ہاؤس کے سامنے ریکارڈ کیے گئے پیغام میں کہا ہے کہ ''آج کا دن بہت خاص ہے، جیسا کہ آپ دیکھ سکتے ہیں کہ میں اپنے سادہ لباس میں صبح سویرے یہاں موجود ہوں، اپنی اس سائیکل پر۔ آج میرا اسلام آباد میں آخری دن ہے''۔

انہوں نے کہا کہ ''کیوں کہ بطور جرمن سفیر پاکستان میں میرا سفر آج ختم ہو رہا ہے اور میں رات کو جرمنی واپس روانہ ہو جاؤں گا۔ اگر کہا جائے کہ ان تین سالوں میں پاکستان میں میرے لیے سب سے منفرد کیا تھا تو میں بلاجھجک کہوں گا کہ وہ پاکستان کے لوگ ہیں۔آپ جیسے لوگ، جن کی سخاوت، جن کی مہمان نوازی، جن کی نرم دلی واقعتاً بے مثال رہی ہے۔''

 

Khuda hafiz, dosto! My stay in 🇵🇰 has come to an end. Three years in this wonderful country flew by all too quickly - thanks esp. to the amazing people I met here. For one last time I speak to all of you through this platform, but rest assured 🇵🇰 remains forever in my heart♥️! 👇 pic.twitter.com/9woedUvMKi

- Bernhard Schlagheck (@GermanyinPAK) June 30, 2022

جرمن سفیرنے مزید کہا کہ ''میں سمجھتا ہوں کہ سچی دوستی کے یہی بنیادی اقدار ہیں۔ بہرطور، میں آپ سب کا شکریہ ادا کرنا چاہتا ہوں، جس اعتماد اور عزم کے ساتھ آپ نے اس دوستی کو بڑھایا ہے، جو ہمارے دونوں ممالک اور لوگوں کے بیچ ہے، اسی کے ساتھ اپنا بہت سارا خیال رکھیے گا۔ میں جانتا ہوں کہ اسلام آباد اور ریڈ زون کا یہ نظارہ کل صبح سے میں نہ دیکھ پاؤں گا''۔

''میں آپ کو یقین دلاتا ہوں کہ پاکستان اور آپ سب، یعنی پاکستان کے لوگ ہمیشہ میری یادوں میں مضبوطی سے جڑے رہیں گے۔ اسی کے ساتھ خدا آپ کا حامی و ناصر ہو اور خدا حافظ''