سوشل میڈیا اورمنفی رویے

سوشل میڈیا میں بھی منفی اور شیطانی ذہن کے لوگوں نے راستے بنائے ہیں۔ فوٹو: انٹرنیٹ

---

وفاقی حکومت نے بلوچستان میں ہلی کاپٹر حادثے میں شہید ہونے والے پاک فوج کے افسروں اور جوانوں کے خلاف سوشل میڈیا پر نفرت انگیز مہم چلانے والوں کے خلاف کارروائی کا فیصلہ کیا ہے۔ اس ضمن میں وفاقی تحقیقاتی ایجنسی کے سائبر کرائم ونگ کے ایڈیشنل ڈی جی کی سربراہی میں چار افسران پر مشتمل جے آئی ٹی تشکیل دے دی گئی ہے۔

تحقیقاتی ٹیم شہدا کے خلاف سوشل میڈیا پر منفی پروپیگنڈا کرنے والے عناصر کی نشاندہی، گرفتاری اور قانونی کارروائی کے امور انجام دے گی۔ دوسری جانب وزیر اعظم شہباز شریف نے کہا ہے کہ ''ہمارے شہدا کی قربانیوں کی توہین اور ان کا مذاق اڑانے والی مہم خوفناک ہے، خود پسند سیاسی بیانیے کا یہی نتیجہ ہوتا ہے۔ ایسے سیاسی بیانیے نوجوانوں کے ذہنوں کو زہر آلود کرتے ہیں ، خود پسند سیاسی بیانیہ سیاسی تقریر کو ہتھیار بنا دیتا ہے۔ ہمیں سوچنا چاہیے ہم کس راہ پر چل پڑے ہیں، یہ لمحہ گہرے غور و فکر کا تقاضا کرتا ہے۔''

پاکستانی عوام ، افواج پاکستان سے بے حد محبت کرتے ہیں، ہماری فوج ہمارا فخر ہے، یہ ملک کی سلامتی اور استحکام کی ضامن ہے۔ ہم سب ملک اور قوم کے لیے اپنی جانوں کا نذرانہ پیش کرنے والے شہداء کی بہت تعظیم کرتے ہیں۔ پاکستان اور پاک فوج سے محبت قوم کے انگ انگ میں ہے اور یہ ایک ایسا لازوال رشتہ ہے کہ دنیا کی کوئی طاقت اس بندھن کو توڑ نہیں سکتی کیوں کہ پاکستان کے عوام جانتے ہیں کہ یہ ادارے ہی اس کی جغرافیائی اور نظریاتی سرحدوں کے محافظ ہیں۔

پاک فوج اور شہداء سے ہمارے دلی جذبات اس طرح جڑے ہوئے ہیں کہ فوج سے متعلق ملی نغمہ اور ترانہ سن کر ہماری آنکھوں میں آنسو آجاتے ہیں۔ مخصوص ذہنیت رکھنے والے سوشل میڈیا ٹرولرز نے افواج اور شہداء کے بارے میں جو منفی باتیں کی ہیں ان سے صرف فوجی خاندانوں اور شہداء کے لواحقین کی ہی دل آزاری نہیں ہوئی، بلکہ ساری قوم کا دل دکھا ہے۔ پاکستان کے لیے یقیناً ایک بہت بڑا نقصان ہے۔

پاکستان کا رقبے کے اعتبار سے سب سے بڑا صوبہ بلوچستان اس وقت شدید ترین بارشوں اور سیلاب کی زد میں ہے۔گاؤں کے گاؤں پانی میں ڈوبے ہوئے ہیں' کھڑی فصلیں تباہ ہو گئی ہیں جبکہ لوگوں کے مکانات بھی سیلاب میں گرے ہوئے ہیں'اس مشکل وقت میں پاک فوج کے افسر اور جوان سیلاب زدگان کو محفوظ مقامات تک پہنچانے اور انھیں خیمے اور خوراک مہیا کرنے کی مشکل ذمے داریاں ادا کر رہے ہیں۔گو صوبے کی سول انتظامیہ بھی اپنے وسائل کے مطابق امدادی سرگرمیوں میں حصہ لے رہی ہے لیکن بلوچستان کے مشکل علاقوں میں جہاں سیلاب کا پانی دریا کا منظر پیش کرتا ہے۔

وہاں پاک فوج کے جوان کشتیوں اور ہیلی کاپٹرز کے ذریعے پہنچتے ہیں اور پانی میں گھرے ہوئے لوگوں کو باہر نکالتے ہیں۔یہ کوئی آسان کام نہیں ہے، لیکن پاک فوج کی تربیت ہی خطروں سے کھیلنا اور مشکل میں پھنسے ہوئے ہم وطنوں کو وہاں سے باحفاظت نکال کر محفوظ مقامات تک پہنچانا اور پھر انھیں خیمے اور کھانے پینے کی اشیا اور طبی امداد فراہم کرنا ہے۔

بلوچستان میں چند دن پہلے امدادی سرگرمیوں کی نگرانی میں مصروف عمل پاک فوج کا ایک ہیلی کاپٹر ضلع لسبیلہ میں حادثے کا شکار ہو کر تباہ ہو گیا۔ ہیلی کاپٹر میں سوار کوئٹہ کے کور کمانڈر لیفٹیننٹ جنرل سرفراز علی سمیت چھ فوجی افسران اور جوان شہید ہو گئے۔ فوجی اہلکاروں کی شہادت پر ملک بھر میں دکھ اور کرب کی ایک لہر دوڑگئی۔

ہر طبقہ فکر سے تعلق رکھنے والوں نے شہداء کے لیے دعائے مغفرت کی اور ان کی بلندی درجات کے لیے دعائیں کیں، لیکن شرپسندوں کے ایک گروپ نے اس دکھ کی گھڑی میں انتہائی سفاکی کا مظاہرہ کرتے ہوئے پاک فوج کے خلاف ایک مذموم اور زہریلی سوشل میڈیا مہم شروع کر دی۔ اس پروپیگنڈا مہم کی وجہ سے پاک فوج اور شہدا ء کے لواحقین کی بے حد دل آزاری ہوئی بلکہ ملک کے سنجیدہ حلقوں نے اس پر دکھ کے ساتھ تشویش کا اظہار بھی کیا ہے کہ پاکستان میںیہ کیا ہو رہا ہے اور ایسے شرپسندوں کے سہو لت کار 'فنانسر اور ہینڈلر کون لوگ ہیں۔

پاک فوج کے خلاف مہم چلانے والے ایک سوشل میڈیا ایکٹیوسٹ کی ایک اعترافی ویڈیو بھی سامنے آئی ہے۔ اس ویڈیو میں اس نے اپنی حرکت پر معافی بھی طلب کی ہے۔ بہرحال پاکستان میں رہ کر ایسی دل شکن اور منفی مہم چلانا 'ایسی حرکت ہے جسے معاف کرنا مشکل ہے۔ حکومت پاکستان کو اس حوالے سے کوئی قابل عمل لائحہ عمل تیار کرنے کی ضرورت ہے تاکہ ایسے سوشل میڈیا ٹرولرز کو بے نقاب کر کے گرفتار کیا جائے اور انھیں قانون کے کٹہرے میں کھڑا کیا جائے۔ بدقسمتی سے حالیہ چند ماہ میں سوشل میڈیا ٹرولرز نے نفرت انگیز پروپیگنڈا کی انتہا کر رکھی ہے۔

پاکستان کی تمام سیاسی جماعتوں بالخصوص پی ٹی آئی کی قیادت کو اس قسم کی حرکت کرنے والوںکی نہ صرف مذمت کرنی چاہیے بلکہ اگر کوئی سوشل میڈیا ٹرولر خود کو کسی پارٹی سے نتھی کرتا ہے تو اس سے علیحدگی کا اعلان کرنا چاہیے۔ اس امر کی تفہیم ضروری ہے کہ فوج نے اگر سیاسی معاملات کے ضمن میں غیر جانبداراور غیر سیاسی رہنے کا کردار اختیار کیا ہے تو اسے سراہا جائے کیونکہ ملک کے آئین کا تقاضا بھی یہی ہے اور جمہوری کلچر بھی یہی سکھاتا ہے۔ قومی اداروں کو سیاسی یا ذاتی تنازعات کی زد میں لانا قومی مفاد کے منافی ہے۔ کسی بھی سیاسی جماعت کے سپورٹر یا چاہنے والے ایسا کرتے ہیں تو ان کے خلاف قانونی کارروائی ہونی چاہیے۔

ہم ففتھ جنریشن وار کے عمل سے گزر رہے ہیں جہاں ہمارے دشمن ڈیجیٹل میڈیا یا میڈیا کے محاذ کو بنیاد بنا کر ہمیں داخلی اور خارجی دونوں محاذوں پر کمزور بھی کرنا چاہتا ہے اور تقسیم بھی۔ وہ معاشرے میں ایک ایسی سیاسی، سماجی، مذہبی، فرقہ وارانہ اور لسانی بنیادوں پر تقسیم پیدا کررہا ہے جو ہمیں کمزور کرے۔ بدقسمتی یہ ہے کہ ہمیں اس ففتھ جنریشن وار کے تناظر میں جس مضبوط حکمت عملی کے ساتھ نمٹنا چاہیے اس میں بہت سی کمزوریاں ہیں۔

ماضی میں پاکستان مخالف قوتوں نے پاکستانی عوام اور فوج کے درمیان دراڑ پیدا کرنے کی پوری کوشش کی لیکن تاریخ گواہ ہے کہ دشمنوں کی ایسی کوششیں بری طرح ناکام ہوئیں۔ ایسے متعدد واقعات سامنے آئے جن میں دہشت گرد تنظیموں نے کسی دوسرے ملک کی سرزمین پر بیٹھ کر پاکستان میں ناپختہ ذہنوں کو ورغلا کر اپنے چنگل میں پھانسا۔ یہ امر واقعہ ہے کہ بیرون ملک مورچہ زن علیحدگی پسند دہشت گرد مختلف سوشل میڈیا پلیٹ فارمز کے ذریعے ریاست پاکستان کے خلاف جھوٹا پروپیگنڈا کر کے پسماندہ علاقوں کے نوجوانوں کو دہشت گردی کے لیے اکساتے رہے ہیں۔

پاکستان کو ایک ناکام ریاست کے طور پر پیش کرنے کے لیے سوشل میڈیا کے ذریعے جعلی معلومات پر مبنی مواد کی تشہیر کر کے عوام میں مایوسی اور غیر یقینی کی کیفیات ابھاری جاتی رہی ہیں۔ لسانی تعصب ، فرقہ ورانہ تقسیم ، سیاسی اختلافات ، سفارتی تعلقات اور حساس مذہبی معاملات پر پاکستانی معاشرے میں تفریق پیدا کرنے کے لیے مسلسل غیر قانونی اور اشتعال انگیزمواد پھیلایا جا رہا ہے۔

پاکستان میں سائبر کرائمز کو روکنے کے لیے جدید انفرااسٹرکچر تعمیر کرنے کی اشد ضرورت ہے۔ اس کے ساتھ ساتھ سائبر کریمینلز اور شرپسند عناصر کو ٹریس کرنے کے لیے انتہائی تربیت یافتہ اسٹاف کی ضرورت ہے۔ پاکستان میں اکثر حضرات سوشل میڈیا کو بحیثیت مجموعی بطور ایک برائی کے پیش کرتے ہیں حالانکہ ایسا بالکل نہیں ہے۔ سوشل میڈیا سرحدوں کی قید سے آزاد گلوبل وائس رکھتا ہے۔

اس پر جدید سائنسی علوم اور علمی مذاکرے بھی ہوتے ہیں ' طالب علموں کے لیے اعلیٰ تعلیم کے حصول میں مدد گار ہونے والی کتابیں بھی با آسانی دستیاب ہو جاتی ہیں۔ اسی طرح سوشل میڈیا انٹرٹینمنٹ کا بھی ایک بہترین ذریعہ ہے۔ یہاں اچھی فلمیں' ڈاکومنٹریز وغیرہ دیکھنے کو ملتی ہیں ' آثار قدیمہ کے حوالے سے مواد اور تاریخی مواد بھی با آسانی دستیاب ہوتا ہے۔ اسی طرح تمام بڑی زبانوں میں لکھا گیا عالمی شہرت کا حامل شعر و ادب بھی موجود ہے۔

جس طرح ہر اچھائی کے ساتھ برائی بھی ہوتی ہے ' اسی طرح سوشل میڈیا میں بھی منفی اور شیطانی ذہن کے لوگوں نے راستے بنائے ہیں۔پاکستان میں بھی فرقہ پرست' انتہا پسند ' دہشت گردوں کو گلوریفائی کرنے والے ' پاکستان کے بجائے افغانستان اور ایران کے مفادات کے لیے کام کرنے والے گروہ سوشل میڈیا کو استعمال کر رہے ہیں۔ ہماری ریاست اور انتظامیہ کو ایسے منفی گروہوں کا قلع قمع کرنا چاہیے تاکہ سوشل میڈیا کو ایسے ناسوروں سے پاک کر کے وطن عزیز اور اس کے مفادات کا تحفظ کیا جاسکے۔