پنجاب بھر کے اسکولز میں اسٹوڈنٹس کونسل سسٹم نافذ 16 اگست کو الیکشن کا اعلان

سکس، سیون، ایٹ، نائن، ٹین کے طلبہ ووٹرز قرار، انتخابی مہم چلا سکیں گے، ادب، سپورٹس، مقابلے، مضمون نویسی و دیگر فرائض ہیں۔ فوٹو: فائل

---

لاہور: وزارت تعلیم پنجاب نے صوبہ بھر میں اسٹوڈنٹس کونسل سسٹم لاگو کر کے 16 اگست کو اسٹوڈنٹس کونسل کے انتخابات کرانے کا شیڈول جاری کر دیا۔

وزارت تعلیم پنجاب نے کالجز طرز پر صوبہ بھر کے تمام مڈل، ہائی، ہائیر سیکنڈری اسکولوں میں طلبہ و طالبات میں ذمہ داریاں نبھانے، اسپورٹس مین اسپرٹ اجاگر کرنے کیلیے اسٹوڈنٹس کونسل سسٹم لاگو کر کے 16 اگست کو اسٹوڈنٹس کونسل کے انتخابات کرانے کا شیڈول جاری کر دیا۔

اسٹوڈنٹس کونسل صدر،نائب صدر اور سیکریٹری جنرل کے3 عہدوں پر مشتمل ہو گی جبکہ ہر کلاس میں ایک کلاس نمائندہ بھی منتخب کیا جائے گا، اس انتخاب کے ووٹرز کلاس سکس، سیون، ایٹ نائن، ٹین کے طلبہ اور طالبات ہوں گے۔ اس بابت باقاعدہ سرکاری سرکلر جاری کر دیا گیا ہے۔

یہ اسٹوڈنٹس کونسل مکمل غیر سیاسی ہوگی، اس کے فرائض میں بزم ادب، اسپورٹس، تقریر،کوئز مقابلے، فیصلہ سازی، انتظامی معاملات دیکھنے،اعتماد سازی، گفت و شنید، کتب بینی فروغ، مضمون نویسی، یوم والدین اور یوم آزادی منانے کی تربیت اجاگر کرنا ہے۔

اسٹوڈنٹس کونسل کے منتخب عہدیداران اور کلاس نمائندے باقاعدہ حلف اٹھائیں گے، باقاعدہ انتخابات موسم گرما کی چھٹیوں کے بعد ہر سال اگست میں ہوا کریں گے، اس کے لئے طلبہ و طالبات باقاعدہ مہم چلا سکیں گے، انتخاب سے قبل ہر امیدوار کو اپنا موقف، اسکول کی بہتری کے لیے اپنا پوائنٹ پیش کرنے کے لئے پانچ پانچ منٹ کا ٹائم دیا جائے گا۔
اسٹوڈنٹس کونسل