پنجاب پولیس نے غیرملکی منشیات فروش کو گرفتار کرلیا
ملزم پاکستان میں روپوش تھا، قبضے سے 1 کلو گرام سے زائد چرس برآمد ہوئی، پولیس
پنجاب پولیس نے نے فیصل ٹاؤن میں کارروائی کر کے غیرملکی منشیات فروش کو گرفتار کرلیا۔
ایکسپریس نیوز کے مطابق فیصل ٹاؤن پولیس نے کوٹھا پنڈ میں کارروائی کرتے ہوئے غیر ملکی منشیات فروش کو گرفتار کیا، جو پاکستان میں غیر قانونی طور پر مقیم تھا۔
پولیس حکام کے مطابق گرفتار ملزم کی شناخت تاجو الدین کے نام سے ہوئی جو مغربی افریقا میں قائم ملک گینی کا رہائشی ہے۔ ملزم کا ایک ماہ قبل ویزہ ایکسپائر ہو چکا ہے۔
ملزم کی جامہ تلاشی پر ہاتھ میں پکڑے شاپر سے 1 کلو 80 گرام چرس برآمد ہوئی۔ ایس ایچ او فیصل ٹاؤن کے مطابق ملزم کیخلاف مقدمہ درج کر کے تحقیقات کا آغاز کر دیا گیا۔
ایس پی ماڈل ٹاؤن حسن جاوید بھٹی نے کارکردگی پر فیصل ٹاؤن پولیس کو شاباش دی۔