سول ایوی ایشن میں کنٹریکٹ پر بھرتیاں فوری روکنے کی سفارش
سول ایوی ایشن سے ملکی معاشی صورتحال کے پیش نظر کفایت شعاری اپنانے کیلیے مختلف سفارشات کی گئی ہیں
سول ایوی ایشن آفیسرز ایسوسی ایشن کے صدر نے معاشی صورتحال کے پیش نظرکفایت شعاری اپنانے کے لیے ڈی جی سی اے اے کومراسلہ ارسال کردیا جس میں سی اے اے کنٹریکٹ بھرتیوں کو فوری طور پر روکنے کا مطالبہ کیا گیا ہے۔
صدر سی اے اے آفیسرز ایسوسی ایشن میاں منیب اقبال نے ڈی جی سی اے اے خاقان مرتضی کوخط لکھا جس میں انہوں نے ملکی معاشی صورتحال کے پیش نظر کفایت شعاری اپنانے کا مشورہ دیا ہے۔ مراسلے کے مطابق ملکی معاشی حالات کو مدنظر رکھ کر انتظامیہ 4 ہزار سی سی کی جگہ 1800 سی سی کی گاڑی استعمال کریں۔
ڈی جی،ایڈیشنل ڈی جی سمیت تمام اعلی افسران کفایت شعاری پلان پر عمل کریں، آفیشل ٹورز کو کم کرکے زوم اور ویڈیو لنک کے ذریعے میٹنگ کو ترجیح دی جائے، بجلی بچت کے لیے دفاتر میں بجلی کا استعمال کم جبکہ نئی گاڑیوں کی خریداری پر فوری پابندی عائد کی جائے۔
مراسلے کے مطابق سی اے اے کنٹریکٹ بھرتیوں کوفوری روکا جائے اورسی اے اے کے اخراجات پربیرون ملک علاج پربھی پابندی عائد کی جائے، تمام دفاتر کے لئے نئے فرنیچرکی خریداری، آفیشل لنچ اور اور ڈنر پر پابندی عائد کی جائے۔