حفیظ عامر آصف کو ٹی10 لیگ کیلئے این او سی مل گیا

سابق کپتان نے بورڈ سربراہ سے ملاقات میں صورتحال سے آگاہ کیا تھا، ذرائع (فوٹو: ایکسپریس ویب)

---

قومی کرکٹ ٹیم کے سابق کپتان محمد حفیظ کو زمبابوے میں شیڈول ٹی10 لیگ کھیلنے کیلئے این او سی جاری کردیا گیا۔

ایکسپریس نیوز کے مطابق پاکستان کرکٹ بورڈ (پی سی بی) کے نئی مینجمنٹ کمیٹی کے سربراہ ذکا اشرف نے زمبابوے میں ہونے والی ٹی ٹین لیگ کے لیے قومی کرکٹرز کو این او سی دینے کے احکامات جاری کردیئے۔

20 سے 29 جولائی تک ہونیوالی لیگ کیلئے سابق کپتان محمد حفیظ، فاسٹ بولر محمد عامر، شاہ نواز دھانی اور بیٹر آصف علی کا معاہدہ ہوا تھا تاہم بورڈ نے کھلاڑیوں کو این او سی دینے سے انکار کردیا تھا۔

مزید پڑھیں: زمبابوے کی ٹی10 لیگ؛ عامر، حفیظ سمیت کئی بڑے نام شامل

گزشتہ روز ایشیاکپ ٹرافی کی تقریب رونمائی میں سابق کپتان محمد حفیظ نے تمام تر صورتحال سے ذکا اشرف کو آگاہ کیا تھا جس کے بعد حفیظ سمیت محمد عامر اور آصف علی کو بھی این او سی جاری کردیا گیا۔ لیگ کھیلنے کی اجازت دینے پر سابق کپتان نے بورڈ سربراہ کا شکریہ ادا کیا۔

مزید پڑھیں: زمبابوے کرکٹ بورڈ نے ملک میں ٹی10 کروانے کا اعلان کردیا

دوسری جانب شاہنواز دھانی کو ایمرجنگ ایشیاکپ میں شرکت کے باعث جانے سے روکا گیا تھا۔

واضح رہے کہ ایفرو ٹی10 لیگ میں 5 ٹیموں کے درمیان ہرارے میں مقابلے ہوں گے۔