ریچا چڈا کی فلم ’’طمانچے‘‘ 11 جولائی کو سنیما گھروں کی زینت بنے گی

فلمی کیرئیر سے پوری طرح مطمئن ہوں، مجھے ابھی تک ایسے ہی کردار مل رہے ہیں جو میں کرنا چاہتی ہوں، ریچاچڈا ۔ فوٹو :فائل

---

بھارتی فلم فقرے کی اداکارہ ریچا چڈا جلد ہی وائلڈ ایلیفنٹ موشن پکچرز کے بینر تلے بنائی جانیوالی فلم ''طمانچے'' میں بڑی اسکرین پر نظر آئیں گی۔

نوینت بھل کی ہدایتکاری میں انڈر ورلڈ پر بنائی جانیوالی اس فلم میں ریچا چڈا کے ساتھ اداکار نکھل دیودی ہیرو کا کردار نبھارہے ہیں۔فلم کا موضوع انڈر ورلڈ ڈان ابو سلیم اور مونیکا بیدی کی محبت پر ہے اور اسے گیارہ جولائی 2014 کو سینما گھروں کی زینت بنایا جا رہا ہے۔امرتسر کے شہر میں پیداہونیوالی 26 سالہ اداکارہ ریچا چڈھا نے 2008ء میں ''اوئے لکی لکی اوئے'' سے کیا جب کہ انھیں اصل پہچان فلم ''گینگ آف وسعی پور'' سے ملی جس میں انھوں نے نغمہ نامی خاتون کا پاورفل رول کیا۔ اس کی یہی جاندار پرفارمنس اسے بالی وڈ کے بڑے بنیرز کی فلموں میں کاسٹ کی جانے لگی۔ اداکارہ نے نئی کاسٹ کے ساتھ بنائی جانیوالی فلم ''فقرے'' میں بھولی پنجابن کا رول بھی فلم بینوں کی توجہ حاصل کرنے میں کامیاب ہوگیا۔

بالی وڈ کے ٹرینڈ میکر سنجے لیلا بنسالی کی سال 2013ء کی سپرہٹ فلم ''رام لیلا'' میں بھی دیپکا پڈوکون ، رنویر سنگھ،سپریا پاٹھک کپور کے ساتھ ریچا چڈھا نے بھی اپنی موجودگی کا احساس دلایا ۔ ایک سوال کے جواب میں اداکارہ کا کہنا تھا کہ میری ہمیشہ سے یہ کوشش کرتی ہوں کہ اسی فلم میں کام کروں ، جس میں میرا کردار جاندار ہو، اسی لیے متعدد فلموں میں کام کی پیشکش رد کردیتی ہوں۔ فلم ''اوئے لکی لکی اوئے'' کے ریلیز ہونے کے ساتھ ہی مجھے بے شمار فلموں کی آفرز ہوگئیں مگر ان میں سے وہی فلمیں کیں جن میں مجھے کردار اچھے لگے۔ ''فقرے'' اور ''گینگ آف وسع پور'' میں کرداروں کو بہت پذیرائی ملی ان میں میری پرفارمنس کو دیکھتے ہوئے سنجے لیلا بھنسالی نے اپنی فلم ''رام لیلا'' میں کاسٹ کیا۔

''رام لیلا'' کو لے کر میں کافی پرجوش اور خوش تھی کیونکہ ہر فنکار سنجے لیلا بھنسالی کے ساتھ کام کرنے کا خواہشمند ہے۔مجھے بھی موقع ملا اور میں نے کافی کچھ سیکھا ہے۔ فلم ''طمانچے'' کے حوالے سے اداکارہ نے کہا کہ یہ زبردست پراجیکٹ ہے کیونکہ اس میں ایک انڈر ورلڈ کی گرل فرینڈ کا کردار نبھانے جارہی ہوں۔اداکارہ نے کہا کہ اس کردار میں حقیقت کا رنگ بھرنے کے لیے مونیکا بیدی کے بارے میں کافی پڑھا اور اس کی چند فلمیںبھی دیکھ چکی ہوں، کیونکہ میں چاہتی ہوں کہ فلم بینوں کو پردہ اسکرین پر کردار ہی نظر آئے ۔ایک سوال کے جواب میں انھوں نے کہا کہ اپنے فلمی کیرئیر سے پوری طرح مطمئن ہوں ، مجھے ابھی تک ایسے ہی کردار مل رہے ہیں جو میں کرنا چاہتی ہوں۔