جڑانوالہ واقعے میں بھارتی خفیہ ایجنسی کا کردار سامنے آگیا
گرفتار ملزمان سے تفتیش میں تمام کڑیاں بھارت سے ملنے لگیں، ذرائع
جڑانوالہ واقعے میں ہندوستان کی بدنام زمانہ خفیہ ایجنسی کا کردار کھل کر سامنے آ گیا۔
ذرائع کے مطابق جڑانوالہ میں مسیحی عبادت گاہوں پر حملوں میں بھارتی خفیہ ایجنسی کے ملوث ہونے کے ٹھوس شواہد ملے ہیں۔ تحقیقات میں ہولناک انکشافات سامنے آئے ہیں اور گرفتار ملزمان سے تفتیش میں تمام کڑیاں بھارت سے مل رہی ہیں۔
ذرائع کا کہنا ہے کہ پوری منصوبہ بندی کے ساتھ یہ واقعہ مسلم مسیحی فسادات پھیلانے کی گہری مذموم سازش تھی۔ پاکستان میں پرامن بسنے والی اقلیتوں، مسلمان آبادی میں اختلافات اور نفرت کا بیج بونے کی گھناؤنی سازش کی گئی۔
ذرائع کاکہنا ہے کہ بھارتی ایجنسی کے لے پالکوں نے چند لوگوں کو ورغلا کر مسیحی برادری کے خلاف منظم انداز میں استعمال کیا۔ دشمن کے ہاتھوں کھیلنے والوں نے کاغذ کے پرزوں پر توہین آمیز کلمات لکھ کر مذہبی مقامات کے قریب پھینکے۔
ذرائع کے مطابق کاغذ کے پرزوں پر توہین آمیز تحریر کے ساتھ مسیحی افراد کے نام اور فون نمبر بھی تحریر تھے۔ مقامی مسلم آبادی کو واقعے میں ملوث کرکے مسیحی چرچ، آبادی، املاک کو نقصان پہنچایا گیا۔
ذرائع کا کہنا ہے کہ بھارتی خفیہ ایجنسی نے مقبوضہ کشمیر میں اقلیتوں اور کشمیریوں پر انسانیت سوز مظالم سے توجہ ہٹانے کے لیے یہ سازش رچائی۔