لیاقت آباد پرندہ مارکیٹ نے مریضوں کی زندگیوں کو خطرے میں ڈال دیا

فوٹو: ایکسپریس

---

سندھ گورنمنٹ اسپتال لیاقت آباد کے باہر لگنے والی اتوار پرندہ مارکیٹ نے مریضوں کی زندگیاں خطرے میں ڈال دی۔

ایکسپریس نیوز کے مطابق کراچی کے علاقے لیاقت آباد میں سندھ گورنمنٹ اسپتال کے باہر ہر اتوار کو پرندہ مارکیٹ لگائی جاتی ہے جہاں سیکڑوں کی تعداد میں بیوپاری اور خریدار مختلف نسل کے رنگ برنگے پرندوں کی خرید و فروخت کرتے ہیں۔ ہر اتوار صبح سے شام تک اس بازار میں شہریوں کی جوق در جوق آمد کا سلسلہ جاری رہتا ہے جس کے باعث دوپہر کے وقت کریم آباد سے لیاقت آباد جانے والے ٹریک پر شدید ٹریفک جام ہوجاتا ہے۔



ٹریفک جام کی وجہ سے سندھ گورنمنٹ اسپتال آنیوالے مریضوں، تیمارداروں اور عملے کی مشکلات میں کئی گنا اضافہ ہوجاتا ہے، اسپتال کے مرکزی دروازے اور اطراف میں رش کی وجہ سے جنرل ایمرجنسی اور امراض قلب کے شعبہ حادثات میں آنے والے مریضوں کو اسپتال تک رسائی حاصل کرنے میں اضافی وقت لگتا ہے جس سے انکی زندگی خطرے میں پڑجاتی ہے۔



اسپتال انتظامیہ کے مطابق کارڈیک ایمرجنسی کے مریض راستے میں پھنس جاتے ہیں جس کی وجہ سے ان کی حالت بھی تشویشناک ہوجاتی ہے، ایمبولنسوں میں بیٹھے مریض اور تیماردار کافی دیر ٹریفک جام میں پھنسے رہتے ہیں، مریضوں کی ایسی حالت دیکھ کر جب اسپتال کے چوکیدار مزاحمت کرتے ہیں تو ان کو دھمکایا جاتا ہے، بیوپاریوں کی غیر سنجیدگی اور پولیس و حکام کی عدم توجہی کی وجہ سے اسپتال کے عملے اور اتوار پرندہ مارکیٹ کے بیوپاریوں کے مابین تلخ کلامی اور جھگڑے معمول بن چکے ہیں۔



اسپتال انتظامیہ کا کہنا ہے کہ انہوں نے کئی بار اس پرندہ مارکیٹ اور غیر قانونی پارکنگ کو منتقل کرنے کے لیے کے ایم سی سمیت دیگر متعلقہ حکام کو خطوط اور درخواستیں لکھی ہیں لیکن بار بار نشاندہی کے باوجود اس سنگین اور دیرینہ مسئلے کو نظر انداز کیا جارہا ہے۔



اسپتال میں آنے والے تیمارداروں اور مریضوں نے کہا کہ اس پوری صورتحال میں اگر کوئی مریض جان سے چلا گیا تو کون جوابدہ ہوگا؟۔ اس طرح کے بازار وہاں ہونے چاہئیں جہاں صحت کے مراکز موجود نہ ہوں اور نا ہی مریضوں کی آمد و رفت میں خلل پیدا ہو، حکام سے اپیل کرتے ہیں کہ وہ اس بازار کے لیے متبادل جگہ فراہم کریں جس سے ہمیں ریلیف مل سکے۔