تنقید سے بابر کا کھیل مزید نکھر کر سامنے آتا ہے عابد علی

تعمیری تنقید کھلاڑی کو بہتر کارکردگی دکھانے کی ترغیب دیتی ہے، اوپنر۔ فوٹو: ایکسپریس ویب

---

ٹیسٹ کرکٹر عابد علی کا کہنا ہے کہ تنقید سے بابر اعظم کا کھیل مزید نکھر کر سامنے آتا ہے۔

پاکستان کرکٹ کی سب سے بڑی ویب سائٹ www.cricketpakistan.com.pk کو انٹرویو میں اوپنر نے کہا کہ تعمیری تنقید کھلاڑی کو بہتر کارکردگی دکھانے کی ترغیب دیتی ہے، اچھی بات ہے کہ بابر اعظم پر تنقید ہوتی ہے جو ہونی بھی چاہیے، وہ جواب اپنے اسکورز کی صورت میں دیتے ہیں، بابر اعظم پاکستان کا ستارہ ہیں، بیٹنگ میں پوری مہارت رکھتے ہیں،انھیں کھیلتے ہوئے دیکھنا ہمیشہ اچھا لگتا ہے۔

یہ بھی پڑھیں: عارضہ قلب کا شکار ہونے والے کرکٹر عابد علی نے پی سی بی کیمپ جوائن کرلیا

انھوں نے کہا کہ قومی ٹیم سے دوری کے باوجود میں اب بھی پْرعزم ہوں کہ اچھی کارکردگی دکھا کر کسی بھی وقت کم بیک کرسکتا ہوں۔ ڈومیسٹک سیزن میں ایک بار پھر کوشش ہوگی کہ ہرمیچ میں شاندار کارکردگی دکھا کر سب کے دل جیتوں، کم بیک کرنا مشکل ضرور ہے لیکن ناممکن نہیں۔

عابد علی نے مزید کہا کہ پاکستان بیٹرز جو اس وقت ٹیم کا حصہ ہیں میں ان کے لیے دعاگو ہوں کہ وہ ہر میچ میں اچھے رنز کریں، سعود شکیل اور سلمان علی آغا پاکستان کے لیے طویل عرصے کھیلنے کی اہلیت رکھتے ہیں، اس کے لییضروری ہوگا کہ وہ ہر میچ میں کارکردگی کو بہتر سے بہتر بنائیں۔