کراچی اسکول میں جنسی ہراسانی کیس میں گروہ ملوث ہونے کا انکشاف

خواتین سے مبینہ زیادتی کے مقدمے میں گرفتار پرنسپل 7 روزہ جسمانی ریمانڈ پر پولیس کے حوالے

---

جوڈیشل مجسٹریٹ ملیر نے گلشن حدید میں اسکول میں خواتین سے مبینہ زیادتی کے مقدمے میں گرفتار اسکول پرنسپل اور مالک کو 7 روزہ جسمانی ریمانڈ پر پولیس کے حوالے کردیا۔

کراچی ملیر کورٹ میں جوڈیشل مجسٹریٹ ملیر کی عدالت کے روبرو گلشن حدید میں اسکول میں خواتین سے مبینہ زیادتی کے مقدمے کی سماعت ہوئی۔

پولیس نے ملزم عرفان غفور کو عدالت میں پیش کیا۔ سرکاری وکیل نے انکشاف کیا کہ ملزم اکیلا نہیں ہے یہ پورا گروہ ہے۔ عدالت نے تفتیشی افسر سے استفسار کیا کہ عرفان کون ہے؟ ملزم سے بیان لیا ہے یا نہیں؟

تفتیشی افسر نے بتایا کہ ملزم سے تفتیش کرنی ہے، مزید ڈیوائس بھی تحویل میں لینی ہیں۔ اب تک 45 سے زائد متاثرہ خواتین کا پتہ چلا ہے۔ ملزم خواتین کو بلیک میل کرتا تھا۔

یہ بھی پڑھیں: کراچی؛ اسکول میں خواتین اور طالبات کو جنسی ہراساں کرنے والا پرنسپل گرفتار

سرکاری وکیل نے موقف دیا کہ یہ ایک گروہ ہے، ملزم سے تفتیش کے بعد مزید کارندے بھی گرفتار کرنے ہیں۔

تفتیشی افسر نے کہا کہ ملزم کے برآمد موبائل فون کا فارنسک بھی کروانا ہے۔ تفتیشی افسر نے ملزم کے جسمانی ریمانڈ کی استدعا کی۔

عدالت نے استدعا منظور کرتے ہوئے ملزم عرفان غفور کو 7 روزہ جسمانی ریمانڈ پر پولیس کے حوالے کرتے ہوئے آئندہ سماعت پر تفتیشی افسر کو پیشرفت رپورٹ جمع کرانے کا حکم دیدیا۔

گلشن حدید میں دو درجن سے زائد ٹیچرز اور اسٹاف سے زیادتی کرنے والا پرنسپل گرفتار
گرفتار ملزم عرفان کے خلاف مقدمہ درج کیا جا رہا ہے
ملزم کے موبائل فون سے 25 سے زائد ویڈیوز برامد
گرفتار ملزم اپنے اسٹاف اور ٹیچرز سے زیادتی کرتا تھا
ملزم کے خلاف قانونی کاروائی کی جا رہی ہے
پولیس… pic.twitter.com/KpANWcIJ9f

— Shahid Saqlain Lak (@ShahidSaqlain) September 4, 2023