دبئی سے آئے مسافروں سے کروڑوں روپے کے لیپ ٹاپ آئی فون اور دیگر اشیا برآمد

برآمد ہونے والے سامان میں آئی پیڈز، کمپیوٹر ریمز اور دیگر سامان برآمد ہوا

---

پاکستان کسٹمز نے جناح ٹرمینل ارائیول پر ایک بڑی کارروائی کرتے ہوئے دبئی سے آنے والے 4 مسافروں سے 6 کروڑ 18 لاکھ روپے مالیت کا سامان ضبط کرلیا۔

کسٹمز کے مطابق دبئی سے آنے والے مسافروں میں اظہر اقبال، محمد فیصل، امجد گل اور زل نورین شامل تھے جو کھیپ کے ساتھ ائیربلیو کی پرواز پے اے" 111" سے کراچی پہنچے تھے۔

شک کی بنیاد پر مسافروں کے سامان کو اسکیننگ مشین سے گزارا گیا تو سامان میں 27 لیپ ٹاپ، 5 کلوگرام کاسمیٹکس، 36 آئی فونز، 37 قیمتی گھڑیاں، 65 آئی پیڈ، 1250 کمپیوٹر ریم، 472 غیرملکی سگریٹس کے کارٹن، 59 ایپل پینسل، 97 ائیرپوڈز اور 21 میک بک کی نشاندہی ہوئی، تمام سامان کو ڈیوٹی و ٹیکسوں کے بغیر اسمگل کرنے کی کوشش کی جارہی تھی۔

ذرائع نے بتایا کہ حکام کی جانب سے مسافروں کو حراست میں لیتے وقت مبینہ طور پر ایک مسافر نے اپنے آپ کو سابق رکن قومی اسمبلی کے طور پر تعارف کرایا جو بعد ازاں تصدیق کے بعد غلط ثابت ہوا۔

مذکورہ چاروں مسافروں کو گرفتار کرکے ان کے خلاف کسٹمز ایکٹ کے تحت مقدمہ درج کرکے ریمانڈ حاصل کرلیا گیا ہے۔