کراچی میں پولیس مقابلوں کے دوران 6 ڈاکو زخمی

مسلح ملزمان شہریوں سے لوٹ مار کرکے فرار ہورہے تھے

---

کراچی میں ڈاکوؤں کے خلاف پولیس کا کریک ڈائون جاری ہے ، سائوتھ ، ملیر ، کیماڑی میں پولیس مقابلوں کے دوران 6 ڈاکو زخمی ہوگئے ۔

سائوتھ زون میں کلفٹن تھانے کی حدود میں مسلح ملزمان شہریوں سے لوٹ مار کرکے فرار ہورہے تھے جن کا پولیس نے تعاقب کیا اور مقابلے کے بعد عیسی خان نامی ملزم کو زخمی حالت میں گرفتار کرلیا۔

ملیر کے علاقے ابراہیم حیدری اور ملیر کینٹ تھانے کی حدود میں پولیس نے دو ڈاکوئوں کو زخمی حالت میں گرفتار کرلیا ، ابراہیم حیدری سے زخمی حالت میں گرفتار ملزم کی شناخت نور امین کے نام سے ہوئی ہے جس کا سابقہ کرمنل ریکارڈ بھی حاصل کیا گیا ہے۔

ملزم کے قبضے سے اسلحہ اور چھینی ہوئی موٹر سائیکل برآمد کی گئی ہے ۔ ملیر کینٹ پولیس نے سفورا ہائیڈرنٹ کے قریب شہریوں سے لوٹ مار کرنے والے ملزم کو زخمی حالت میں گرفتار کرلیا ۔ ملزم زین اسحق زخمی حالت میں گرفتار کیا گیا جبکہ اس کے دو ساتھی حمزہ اور فرانسس موقع سے فرار ہونے میں کامیاب ہوگئے ۔

ضلع کیماڑی پولیس نے ڈاکس کے علاقے میں شہریوں سے لوٹ مار کرنے والے ملزم کو گرفتار کرلیا ۔ گرفتار ملزم ظہیر کے قبضے سے اسلحہ برآمد کیا گیا ہے ۔