فاسٹ بولر نسیم شاہ آسٹریلیا ٹور سے بھی باہر
خرم شہزاد اور صاحبزادہ فرحان کو آسٹریلیا کے لیے آزمایا جاسکتا ہے، ذرائع
فاسٹ بولر نسیم شاہ ورلڈکپ کے بعد دورہ آسٹریلیا میں بھی دستیاب نہیں ہوں گے۔
ذرائع کے مطابق کندھے کی انجری کے بعد وہ تیزی سے روبصحت ضرور ہیں تاہم ابھی تک انہوں نے بولنگ شروع نہیں کی، نسیم شاہ کو چھ ہفتوں کا آرام تجویز کیا گیا تھا جس کی تکمیل کے بعد انہوں نے ہلکی پھلکی مشقوں کا آغاز کردیا ہے تاہم بولنگ شروع کرنے میں ابھی مزید وقت لگے گا۔
نیوزی لینڈ کے خلاف سیریز تک ان کے سو فیصد فٹ ہونے کے امکانات ہیں۔ بائیس سالہ نسیم شاہ ایشیا کپ کے دوران انجرڈ ہوئے تھے، ورلڈکپ میں ان کی عدم موجودگی کو پاکستان ٹیم کے لیے بڑا نقصان قراردیا گیا تھا۔
مزید پڑھیں: بابراعظم کی پی سی بی ہیڈ کوارٹر میں ذکا اشرف سے اہم ملاقات
پاکستان اور آسٹریلیا کے درمیان تین ٹیسٹ میچز کی سیریز کا آغاز چودہ دسمبر سے ہونا ہے جس میں پاکستان ٹیم شاہین شاہ آفریدی، حارث رؤف، وسیم جونیئر اور حسن علی پر انحصار کرے گی۔ ڈومیسٹک کرکٹ کے ٹاپ وکٹ ٹیکر فاسٹ بولر خرم شہزاد کو بھی آسٹریلیا کے لیے آزمایا جاسکتا ہے۔
مزید پڑھیں: انجری کا شکار نسیم شاہ ایشیاکپ سے باہر ہوگئے
خرم شہزاد نے آٹھ میچز میں چھتیس کھلاڑیوں کو شکار کیا ہے جس میں ایک بار پانچ وکٹ شامل ہیں۔ قائداعظم ٹرافی کے سات میچز میں آٹھ سو سنتالیس رنزبناکر ٹاپ کرنے والے صاحبزادہ فرحان کو بھی آسٹریلیا کا ٹکٹ ملے گا۔
سابق کپتان سرفراز احمد بھی ممکنہ کھلاڑیوں میں شامل ہوں گے۔ دوسری طرف قومی کرکٹرز کی اکثریت پاکستان میں تربیتی کیمپ لگانے کے حق میں نہیں۔ ان کا موقف ہے کہ آسٹریلیا روانگی دو دسمبر کے بجائے انتیس یا تیس نومبر کو رکھ کر وہاں کیمپ لگانا زیادہ مفید ہوگا۔