علم ِفلکیات کی روشنی میں آپ کا یہ ہفتہ

4 تا 10 دسمبر 2023

---

برج حمل
سیارہ مریخ ، 21 مارچ تا 20 اپریل
اس ہفتے کی اہم تاریخیں 4،5،8 اور9 دسمبر یعنی ابتدا و انتہائے ہفتہ ہیں۔ آپ کا سیارہ بیرون ملک اور دوردراز سفر کے امور کو متحرک کررہا ہے۔ اگر آپ بیرون ملک سفر کے لیے کوشاں ہیں تو ان تاریخوں میں مثبت پیش رفت کا امکان موجود ہے۔

یہاں عطارد راجع یعنی الٹے پاؤں بھی چلنے والا ہے۔ ضروری کاغذات میں کوئی خرابی ممکن ہے کوئی تعطل پیدا کردے۔ اس سلسلے میں متوجہ رہیں۔ شریکِ حیات کے ساتھ فاصلے و تلخی کا اندیشہ ہے۔

برج ثور
سیارہ زہرہ ، 21اپریل تا 20 مئی
6 اور 7 دسمبر ایسی تاریخیں ہیں جو بننے والے کام میں بگاڑ کو دکھارہی ہیں۔ محتاط رہیں اور کسی غلط فہمی کو اپنے اندر اتنی جگہ نہ دیں کہ رشتوں اور تعلقات میں بگاڑ کے کانٹے سر اٹھانے لگیں۔ یہ اس سلسلے میں ''سرخ'' ایام ہیں۔ اولاد اور مالی حوالے سے کچھ مسائل وقتی طور پر پریشان کرسکتے ہیں۔ ذہنی طور پر الجھاؤ رہ سکتا ہے۔

برج جوزا
سیارہ عطارد ، 21مئی تا 21 جون
آپ کا سیارہ اس ہفتے راجع ہورہا ہے اور ایسے خانے میں راجع ہورہا ہے جو نحس کہلاتا ہے۔ وہاں سے یہ پلٹ کے ازدواجی خانے میں آرہا ہے۔ یہ ایک مشکل وقت ہوسکتا ہے جو پرانے مسائل کو تازہ کرسکتا ہے جس کا اثر آپ کے شریکِ حیات کو آپ سے دور کرنے کا کام کرسکتا ہے۔ کوئی نیا تعلق جنم لے سکتا ہے لیکن اس سلسلے میں اطمینان نظر نہیں آرہا ہے۔

برج سرطان
سیارہ قمر ، 22جون تا 23 جولائی
سفر کے امور میں خرابی اور رکاوٹ کا سامنا ہوسکتا ہے اور یہ ابھی مزید رہ سکتا ہے۔ بزرگوں کے ساتھ معاملات زیادہ اچھے نظر نہیں آتے، اس سلسلے میں صبر وبرداشت پیدا کرنے کی ضرورت ہے۔ اگر آپ تحقیق کے کسی شعبے سے منسلک ہیں تو زیادہ غوروفکر کی ضرورت ہے۔ جنسی اعضاء میں صحت کی خرابی کا اندیشہ بھی موجود ہے۔

برج اسد
سیارہ شمس ، 24جولائی تا 23 اگست
اس ہفتے ایک اجنبی، جو کہ بیرون ملک یا اجنبی مقام سے تعلق رکھتا ہے، سے آپ کی ملاقات ہوسکتی ہے اور یہ محبت کے خانے میں ملاقات ہورہی ہے۔ جمعرات اور جمعے کے ایام میں بچوں کی ساتھ ساتھ اپنے معدے کا بھی خیال رکھیں۔ یہاں جگر اور معدہ متاثر ہوتا ہوا نظر آتا ہے۔ یہاں شریکِ حیات کے ساتھ بھی پرانی تلخی پھر سے گرما گرمی میں شدت لاسکتی ہے۔

برج سنبلہ
سیارہ عطارد ، 24 اگست تا 23 ستمبر
اخراجات کا گراف بلند ہے لیکن امید ہے آمدن میں بھی بہتری ہوگی، اگرچہ اس کا گراف اتنا اچھا نہیں ہے لیکن کافی حد تک توازن برقرار ہوسکتا ہے۔ آپ کا سیارہ راجع ہوکے سورج سے ملاقات کرنے کی طرف جارہا ہے۔ بیرون ملک کے حوالے سے کوئی منصوبہ ردوبدل کا شکار ہوسکتا ہے۔ یہاں مشتری، زہرہ اور زحل کے درمیان ایک بننے والا تعلق آپ کے نئے تعلق میں مزید بہتری کو ظاہر کررہا ہے۔

برج میزان
سیارہ زہرہ ، 24 ستمبر تا 23اکتوبر
آپ کا سیارہ اس ہفتے طالع سے نکل کے دوسرے خانے عقرب میں جارہا ہے، جہاں مالی امور پر توجہ زیادہ رہنے والی ہے۔ یہاں گلا بھی خراب رہ سکتا ہے۔ کوشش کریں کہ زود ہضم غذا کو ترجیح دیں۔ آپ کے سفر اور قریبی رشتے داروں کے خانے میں شمس و مریخ موجود ہیں۔ قریبی افراد کے ساتھ تعلق میں گڑ بڑ ہوسکتی ہے۔ بزرگوں، اعلٰی تعلیم اور بیرون ملک سفر کے امور میں کچھ مسائل ہوسکتے ہیں۔ محتاط رہیں۔

برج عقرب
سیارہ پلوٹو ، 24 اکتوبر تا 22 نومبر
اس ہفتے کی 4، 5اور9 دسمبر اہم تواریخ اہم ہوسکتی ہیں۔ بیرون ملک اور شادی خصوصاً دوسری شادی کے خواہش مند یا اس سلسلے میں کوشاں افراد کو کام یابی مل سکتی ہے۔ بیرون ملک یا بزرگوں کے تعاون کی وجہ سے مالی فائدہ ہوسکتا ہے۔ بیرون ملک جانے والوں کو کسی قسم کے کاغذی مسائل کا سامنا ہوسکتا ہے۔

برج قوس
سیارہ مشتری ، 23 نومبرتا 22 دسمبر
آپ کے طالع میں دو سعد سیارے ہم کلام ہورہے ہیں جوکہ بیرون ملک سفر اور اعلٰی تعلیم میں پیش رفت اور کام یابی کو ظاہر کررہے ہیں۔ یہاں عطارد کا الٹے پاؤں چلنا ازدواجی خرابیوں کے کانٹے اگا سکتا ہے۔ پرانے مسائل نئی صورت میں سامنے آسکتے ہیں۔ یہاں عدالتی کارروائی کا بھی امکان موجود ہے، محتاط رہیں۔ آپ کی صحت بھی متاثر ہوسکتی ہے۔

برج جدی
سیارہ زحل ، 23 دسمبر تا 20 جنوری
آپ کو سفر کے حوالے سے کاموں میں ہوتے ہوتے نہ ہونے سے دوچار ہونا پڑسکتا ہے۔ ایک ماہ کے لیے یا تو تعطل ہوسکتا ہے یا پھر معاملہ بالکل ختم ہوسکتا ہے، لیکن امکان یہی ہے کہ عارضی ہے، کیوںکہ جنوری میں آپ پھر سے کامل تیاری کے ساتھ میدان میں اتریں گے۔ بچوں کی صحت اور تعلیم کے سلسلے میں غیراطمنان بخش صورت حال ابھی رہے گی۔

برج دلو
سیارہ یورنیس ، 21 جنوری تا 19 فروری
مشتری ایک سعد ترین سیارہ سمجھا جاتا ہے لیکن یہ مخصوص صورت حال میں خرابی کی بنیادی وجہ بھی بن جاتا ہے، لیکن یہ خرابی سارے امور کے لیے نہیں ہوتی جیسا کہ آپ کے چارٹ میں گذشتہ چھے سات ماہ سے ازدواجی خرابی کو وقتاً فوقتاً خراب کرتا آرہا ہے۔ یہ سلسلہ ابھی جاری ہے، اس لیے محتاط ہونے کا مشورہ ہے، کیوںکہ عطارد بھی خرابی میں اپنا حصہ ڈالنے آچکا ہے۔ ایک ماہ اس خرابی کے عروج کا ہوسکتا ہے۔

برج حوت
سیارہ نیپچون ، 20 فروری تا 20 مارچ
آپ کا سیارہ نیپچون طالع ہی میں براجمان ہے لیکن دیگر سیاروی صورت حال ایسی ہے کہ کام ہوتے ہوتے سینچری کے قریب کے باوجود آخری اسکور پر آؤٹ ہونے جیسی صورت حال درپیش ہوسکتی ہے۔ مالی فائدہ نقصان میں تبدیل ہوسکتا ہے اور یہ صورت حال ایسی ہوگی کہ ایک دھند سی ہوگی۔ کہیں بھی سرمایہ کاری نہ کریں اور سبز باغ سے دور رہیں۔