’سالی سے ناجائز تعلقات‘ ہم زلف کو قتل کرنے والا ملزم سگے بھائی سمیت گرفتار
ملزمان کے قبضے سے آلہ قتل راڈ اور ٹوکہ برآمد
'سالی سے ناجائز تعلقات' پر ہم زلف کو قتل کرنے والے ملزم کو سگے بھائی سمیت گرفتار کرلیا گیا۔
رائیونڈ انویسٹی گیشن پولیس نے شہری کے اندھے قتل کا معمہ حل کرلیا، ملزم فرمان عرف مانی اور اس کے بھائی شعبان عرف نومی کو گرفتار کرلیا۔ ڈی آئی جی انویسٹی گیشن عمران کشور نے پولیس ٹیم کو ملزمان کی فوری گرفتاری کا ٹاسک دیا تھا۔
انچارج انویسٹی گیشن رائیونڈ سٹی قمر ساجد کے مطابق مقتول ندیم سجاد کے اپنی سالی کے ساتھ ناجائز تعلقات تھے جس کا اس کے ہم زلف کو رنج تھا۔ گرفتار ملزمان بہانے سے ندیم سجاد کو مکئی کے کھیتوں میں لے گئے اور اُس کے سر میں لوہے کے راڈ مار کر قتل کر دیا اور موقع سے فرار ہوگئے۔
مقتول کے بھائی نے اس کے اغواء کا مقدمہ تھانہ رائیونڈ سٹی میں درج کروا رکھا تھا، ملزمان کو ہیومن انٹیلی جنس سمیت جدید ٹیکنالوجی کی مدد سے گرفتار کیا گیا جن کے قبضے سے آلہ قتل راڈ اور ٹوکہ برآمد کر لیا گیا ہے۔