کویت کیساتھ ایک ارب ڈالر کا فنڈ قائم کرنیکی تیاریاں مکمل

تفصیلی ورکنگ پلان جلد جوائنٹ ورکنگ گروپ میں پیش ہوگا، ذرائع، حکام کی بھی تصدیق ۔ فوٹو : فائل

---

پاکستان نے مائننگ سیکٹر میں سرمایہ کاری کیلیے کویت کے ساتھ 1 ارب ڈالر کا فنڈ قائم کرنے کی تیاریاں مکمل کرلیں۔

ذرائع نے ایکسپریس ٹریبیون کو بتایا کہ پاکستان کی جانب سے ایک سرکاری کمپنی کو اس حوالے سے نامزد کیا گیا ہے، جبکہ اس حوالے سے دونوں ممالک کے درمیان ابتدائی میٹنگ بھی ہوچکی ہے، جس میں کویتی کمپنی نے رینیوایبل انرجی میں استعمال ہونے والی دھاتوں کی مائننگ میں دلچسپی کا اظہار کیا ہے۔

ذرائع کا کہنا ہے کہ مزید معاملات کو طے کرنے کیلیے تفصیلی ورکنگ پلان جلد جوائنٹ ورکنگ گروپ میں پیش کیا جائے گا۔

یہ بھی پڑھیں: پاکستان اور دبئی کے درمیان 3 ارب ڈالر سے زائد سرمایہ کاری کا معاہدہ

ذرائع کا کہنا ہے کہ غیرملکی سرمایہ کاری کی راہ میں حائل رکاوٹوں کو دور کرنے کیلیے پیٹرولیم ڈویژن کے تحت منرل سیل قائم کیا گیا ہے، اور حکومت نیشنل منرل پالیسی پر بھی نظرثانی کررہی ہے، حکومت مجوزہ نئی پالیسی میں ان تمام رکاوٹوں کو دور کر دے گی جو غیر ملکی سرمایہ کاری کی راہ میں کھڑی ہیں۔

حکام کا کہنا ہے کہ نئی منرل پالیسی پر کام جاری ہے اور گیپ اینالیسز پر کام کیا جارہا ہے، جبکہ پروونشل منرل کنسیشن رولز کو اگلے چند ماہ میں فائنل کرلیا جائے گا۔

یاد رہے کہ اس وقت حکومت غیر ملکی سرمایہ کاری کیلیے یواے ای، سعودی عرب اور کویت کی طرف دیکھ رہی ہے۔