ملک میں یومیہ 4 ہزار میٹرک ٹن تیل کی اسمگلنگ کا انکشاف

قومی خزانے کوماہانہ 3 کروڑ 56 لاکھ ڈالرکا نقصان، اسمگلنگ کی روک تھام کیلیے اقداما ت کریں، OCAC کاسیکریٹری پٹرولیم کوخط۔ فوٹو:فائل

---

ملک میں یومیہ 4ہزار میڑک ٹن تیل کی اسمگلنگ کا انکشاف ہوا ہے۔

ایک نجی ٹی وی کی رپورٹ کے مطابق ملک میں یومیہ 4ہزار میٹرک ٹن تیل کی اسمگلنگ کا انکشاف ہوا ہے جس سے قومی خزانے کو ماہانہ 3کروڑ 56 لاکھ ڈالر کا نقصان ہو رہا ہے۔آئل کمپنیز نے اسمگلنگ کی روک تھام اور کارروائی کے لیے حکومت اور اوگرا سے مدد مانگ لی ہے اور آئل کمپنیز ایڈوائزری کونسل (او سی اے سی) نے سیکریٹری پٹرولیم کو خط لکھ دیا ہے۔

خط میں کہا گیا ہے کہ پٹرول اور ڈیزل کی فروخت کی صورتحال کورونا کے عرصے کے برابر ہوگئی ہے۔ گزشتہ سال کے مقابلے میں جولائی تا فروری ڈیزل، پٹرول کی فروخت 6.5 فیصد کم رہی۔خط میں کہا گیا ہے کہ تیل کی اسمگلنگ سے تیل کی سپلائی چین بری طرح متاثر ہوئی ہے۔ اس لیے تیل اسمگلنگ روکنے کے لیے اقدامات کیے جائیں۔

او سی اے سی نے سمگل شدہ تیل کے خلاف ملک بھر میں کریک ڈاؤن کرنے اور تیل اسمگلنگ کے خلاف قانون سازی کی سفارش کی ہے۔کونسل نے غیر قانونی پیٹرول پمپ فوری بند کرنے کا مطالبہ کرتے ہوئے تیل کی اسمگلنگ کے خلاف ملک گیر مہم شروع کرنے کی بھی سفارش کی ہے۔