لاہور اسلحے کے زور چھینے گئے بکرے مالکان کے حوالے گینگ گرفتار
واقعہ لاہور کے علاقے مغل پورہ میں پیٹرول پمپ پر پیش آیا تھا، بکروں کی مالیت 8 لاکھ روپے تھی
پنجاب کے دارالحکومت کے علاقے مغل پورہ کی حدود میں قائم پیٹرول پمپ پر مسلح افراد نے ملازمین کو یرغمال بنا کر چار بکرے چھین لیے تاہم پولیس نے بروقت کارروائی کرتے ہوئے گینگ کو گرفتار کر کے جانور مالک کے حوالے کردیے۔
تفصیلات کے مطابق لاہور میں عید قربان کی آمد بکرے چھیننے کی وارداتیں عروج پر پہنچ گئیں ہیں، ایک اور واردات میں ڈاکوؤں نے پٹرول پمپ ملازمین کو یرغمال بنا کر واردات کی اور چار قیمتی بکرے چھین کر فرار ہوگئے تھے۔
واقعہ تھانہ مغلپورہ کی حدود میں پیش آیا، جس کی سی سی ٹی وی فوٹیج بھی سامنے آئی۔ جس میں دیکھا جاسکتا ہے کہ چار ملزمان پیٹرول پمپ ملازمین کو یرغمال بنا کر واردات کررہے ہیں۔
واقعے کا مقدمہ پیٹرول پمپ مالک طاہر کی مدعیت میں تھانہ مغل پورہ میں درج کیا، مدعی مقدمہ نے مؤقف اختیار کیا تھا کہ ملزمان نے چوکیداروں کو اسپرے سے بے ہوش کیا اور دیگر عملے کو یرغمال بنا کر 8 لاکھ روپے مالیت کے چار بکرے اپنے ساتھ لے گئے۔
دوسری جانب ڈی آئی جی آپریشنز محمد فیصل کامران کے حکم پر سول لائنز ڈویژن نے فوری ایکشن لیتے ہوئے مغلپورہ میں قربانی کے بکرے چوری کرنے والے گینگ کو گرفتار کرلیا، پولیس کے مطابق گرفتار ملزمان میں سرغنہ بلال شاہ اور سلمان شامل ہیں جن سے مزید تفتیش جاری ہے جبکہ مزید دو ملزمان کی تلاش میں چھاپے مارے جارہے ہیں۔
ترجمان آپریشنز ونگ کے مطابق ملزمان کے قبضہ سے 08لاکھ روپے مالیت کے جانور برآمد ہوئے جنہیں مالکان کے حوالے کردیا گیا ہے، ملزمان کو سیف سٹی اتھارٹیز اور سی سی ٹی وی کیمروں کی مدد سے گرفتار کیا گیا۔ ڈی آئی جی آپریشنز نے ایس پی سول لائنز اور ٹیم کو بروقت اور کامیاب کارروائی پر شاباش بھی دی۔
واضح رہے کہ چند روز قبل پولیس نے اسلحے کے زور پر شہری سے بکرا چھیننے والے دو رکنی گینگ کو گرفتار بھی کیا تھا جس نے پانچ وارداتوں کا انکشاف کیا تھا۔