کے الیکٹرک کے بلوں میں میونسپل ٹیکس میئر کراچی و دیگر کو نوٹس جاری

مئیر کراچی اور کے الیکٹرک کے درمیان ہونے والے معاہدے کو کالعدم قرار دیا جائے، درخواست گزار (فوٹو: فائل)

---

سندھ ہائیکورٹ نے کے الیکٹرک کے بلوں میں میونسپل ٹیکس کی وصولی سے متعلق درخواست پر میئر کراچی و دیگر کو نوٹس جاری کردیے۔

ایکسپریس نیوز کے مطابق ہائیکورٹ میں کے الیکٹرک کے بلوں میں میونسپل ٹیکس کی وصولی سے متعلق اپوزیشن لیڈر سیف الدین ایڈوکیٹ کی درخواست پر سماعت ہوئی۔

درخواست گزار کے وکیل عثمان فاروق ایڈوکیٹ نے موقف دیا کہ کے الیکٹرک کی کارکردگی، بجلی کی قیمتوں میں اضافے اور اور بلنگ سے پریشان ہے، اب بجلی کے بلوں میں میونسپل ٹیکس بھی شامل کردیا گیا ہے۔

مئیر کراچی نے میونسپل ٹیکس کی وصولی کے الیکٹرک کو آؤٹ سورس کردی ہے، اپوزیشن سے مشاورتی عمل کو بائی پاس کرتے ہوئے معاہدہ کیا۔

مئیر کراچی نے اپوزیشن جماعت اسلامی اور پی ٹی آئی سے کوئی مشاورت نہیں کی۔

مئیر کراچی مرتضیٰ وہاب کی جانب سے لگائے میونسپل ٹیکس کو غیر قانونی قرار دیا جائے، مئیر کراچی اور کے الیکٹرک کے درمیان ہونے والے معاہدے کو کالعدم قرار دیا جائے۔

عدالت نے مئیر کراچی اور دیگر فریقین کو نوٹس جاری کرتے ہوئے فریقین سے 27 اگست کو جواب طلب کرلیا۔